الجزء العاشر

الأربعين 1

ازينب والسبايا

زينب ابطف كربله             تسأل الدفّانه

   وين كًبر حسين اخوي  المات منحور

—————————————-

جيت متعنيه ابشوكًي            لبوالسجاد الغريب

أرد أحب كًبره واشمه          وارتوي ابعطر الحبيب

أرد أعزيه ابرقيه                 الماتت ابموقف عجيب

ماتت الطفله ابشهكًه          الراس والدها ابنحيب

اليوم اجينه امن اليسر        محّد اتلكًانه

كل حيادتنه نيامه وسط الكًبور

__________________

يا علي دلّيني عمه          وين آثار الاحباب

وينها خيمة احسين      أوّين جلسات الشباب

وين أبوك احسين يكًعد     يجتمع ويّه الاصحاب

وخيمة العباس وين        المنها كًلب احسين ذاب

كًلها وسالت دمعته       اشتفت بيه عدوانه

انحركًت الخيمه يعمه وانطفى النور

_______________________

اهناه ياعمه بنوها             خيمة عمي بو الفضل

وصارت الصيحه بخيمنه        يوم ساقينه انجتل

اهنا ابوي احسين محني       وكًف ودموعه تهل

وطيّح الخيمه وعمدها         امن انفكًد منّه البطل

يوم ذكرت طيحته             اتكوّمت نحلانه

اتنادي بو فاضل يخويه اتهدّم السور

———————————–

يخوتي يا ما كًعدنه               اوياكم كًعدات السعد

راحت ايام السعاده               وجتنه أيام النكد

روسكم كلها جبتها               ودمعي بجفوني جمد

جيتكم مكسور كًلبي             اشلون جيت اشلون ارد

ردّت ويّاي الحرم              من الهظم دوهانه

وليله حضنت كًبر ابنها ابدمع منثور

__________________

ولن حريم امن آل أسد      اتكًلهم المتحيره

ما رأيتوا جسد مرمي       اعظام صدره امكسره

اتكًلها شفنه الجثث كثره    ابليّه روس اعلى الثره

وشفنه يمهم طفل مرمي       النبله كًطعت منحره

وبطل شفنه اعلى النهر       امكًطّعه ذرعانه

منهي انتي التسأليني عن هالبدور

———————————–

كًالت الها آنا زينب           جان اسمي ام الخدر

بس وصلت الغاضريه        راح خدري واندثر

راحت ارجالي واخوتي      والبست حبل اليسر

ورحت مسبيه اليزيد        وحادي اظعوني الشمر

اليوم جيت امن اليسر        اعلى اخوتي ولهانه

حرمه مسبيّه وحزينه وكًلبي مكسور          

                    ========== تمت       

اظهر المزيد
شاهد أيضاً
إغلاق
زر الذهاب إلى الأعلى