الإمام علي و الزهراء (ع)

سيل الدمع سيل       للرَاحله ابليل

سيل الدمع سيل       للمالها امثيل

الإمّ الأيمّه فاطمه      يا جفنى هل دمعك دمه

سيل الدمع سيل

  *     *     *

يا روح كلب المصطفى      يا نجمة اسهيل

يسراج بيتي اللي انطفه      يالچنتي قنديل

شخصج من البيت اختفه      و اتهدم الحيل

بعدج على الدنيه العفه       خل دمعتي اتسيل

اولادج عليج امعلّمه      يا جفني هل دمعك دمه

سيل الدمع سيل

  *     *     *

رُكنين چانولي قِوي     و الهادي من راح

لن رُكني الثاني هوى     وكلبي هوه و طاح

يا روح كلبى اللي     انجوه شيطيب الجراح

يالچنتي البيتى ضوه     من انطفه المصباح

روحي عليج امألّمه     يا جفني هِل دمعك دمه

سيل الدمع سيل

  *     *     *

لبچي و اهل دمّ الدّمع     السيدة النسوان

جانت إلي سيف و درع     من رمي العدوان

عصروها و بكسر الضلع     منها الأجل حان

من مثلي بالزهره انفجع     و عاشرت الاحزان

فجعتني كوم المجرمه     يا جفني هِل دمعك دمه

سيل الدمع سيل

  *     *     *

يالهادي هاك الطاهره     هاك الوديعه

دخذ الأمانه امكسّره     اضلوع الشفيعه

جتك البضعه امعوره     وشلون ضيعه

خلها تخبرك بالجره     ابنار و فجيعه

هالنار ضلت مضرمه     يا جفني هل دمعك دمه

سيل الدمع سيل

  *     *     *

يالهادي هاك اوديعتك     مني استلمها

اسئلها اشسوت أمتك     منهو طعنها

بالباب يوم النادتك     طكها ابوجنها

وآنا امتثلت اوصيّتك     واغضيت عنها

اعليّه الهموم اململمه     يا جفني هل دمعك دمه

سيل الدمع سيل

  *     *     *

انشدها عالجاب الحطب     و ناره سجرها

بالباب رادت تنحجب     عمدًا عصرها

من صرخت الظالم غضب     بيده سطرها

و ضلعين منها ابلاسبب     المجرم كسرها

من طاحت اعليها انغمه     يا جفني هل دمعك دمه

سيل الدمع سيل

  *     *     *

وكعت الزهره و مادرت     محسن على الكاع

من طاح روحه فرفرت     واستشهد ابساع

ما بينهم آنا حرت     والكلب ملتاع

مجتوفه إيدي و مكدرت     ومنه الطفل ضاع

تشهدلي انجوم السمه   يا جفني هل دمعك دمه

سيل الدمع سيل

  *     *     *