يالمعتني للمحراب خوفي الدهر ظم لي اصواب
حيرني أمرك هالليله حيرني أمرك
و اتذكّرت نار الباب وضلع امي جرح الماطاب
حيرني أمرك هالليله حيرني أمرك
لورحت منه مَيْفِل حزنه
* * *
زينب من ألمها تذرف الدمعه
من شافت ابوها مبتدل وضعه
يبويه اتكلّه روحي اعليك منفجعه
كل خوفي يبو الحمله ابهالطلعه
بعد سالم البيتك ما إلك رجعه
يبويه و ليطشره الدهر شيجمعه
رؤياك أظن تأويله ينهدم سور العيله
بيها نوايب هالليله بيها نوايب
يا ويلي من هالليله روحي تظل انحيله
بيها نوايب هالليله بيها نوايب
امن الليله چنه مَيْفِل حزنه
* * *
يكلها صبري تدرين القضا جاري
و اريد أشرح إلج نُبذه من اسراري
الشهاده أنتظرها ليلي و انهاري
يبويه و اعتبرها نعمة الباري
من الجامع أرد امصوب الداري
و تظل تسعر يزينب نارچ و ناري
للبيت أرد امصوب ابدم الشهاده امخضّب
هلت دمعها و صاحت هلت دمعها
فدوه غدت لك زينب يا بويه نارك تلهب
هلت دمعها و صاحت هلت دمعها
نفداك كلنه مَيْفِل حزنه
* * *
تبشّرني ابمصايب يالولي و تدري
ابفكد أمي أنا المهظومه من صغري
شسوي لو فكدتك يا بعد عمري
يگلها اتصبّري بويه مثل صبري
يزينب و المرد روحي و كسر ظهري
تجين الكوفه مسبيّه و انا ابكبري
و تتصدق عليج الناس كلسا يمر يمّج راس
صار الذكرته ياحيدر صار الذكرته
بعدك مشيت اويه ارجاس يم راس اخوي العباس
صار الذكرته ياحيدر صار الذكرته
كطعوا نسلنه مَيْفِل حزنه
* * *
مصاب الينسمع غير الذي انشوفه
وانا بإسم المصايب صرت معروفه
يبويه اميسّره طبيت للكوفه
بلا والي ابحبل اليسر مچتوفه
و عفت عباس اخيي امكطعه اچفوفه
و راس حسين ابكتري و دربي ماشوفه
عفت اخوتي اعلى التربان بويه اعتنيت السلمان
و ظلوا بنينك يا حيدر وظلوا بنينك
بالشمس من غير اچفان ما حصل إلهم دفان
و ظلوا بنينك يا حيدر وظلوا بنينك
ابطيحة علمنه مَيْفِل حزنه
* * *
يبويه و اعظم اعليه و أشد حسره
حضرت حسين يوم الطاح من مهره
و شفت شمر الضبابي اتربع ابصدره
صحت وينج ييمه لحگي يا زهره
تعالي الإبنج الظامي انكطع نحره
ابركض الخيل طبگوا صدره ابظهره
عنهم مشينه ابيا حال عالهزل نسوه و اطفال
مرينه بيهم ياحيدر مرينه بيهم
كلهم جثث فوك ارمال بالشمس ما صح اظلال
مرينه بيهم ياحيدر مرينه بيهم
صحنه يهلنه مَيْفِل حزنه
* * *