الحسين (ع) والمحشر
يحسين ابجدّك لاتنسانه يوم المحشر
يم نهر الكوثر تتلگانه يوم المحشر
ابحب الرضعتك اتساعد شيعيتك
يوم المحشر
=============
إلهي ابحق رسول الله حبيبك والد العتره
تجبر كل گلب مكسور ابمصاب احسين وابصبره
فطرس كسرة اجناحه ابمهد احسين تم جبره
واحنه الدّنيه غرّتنه ثقيله اذنوبنه وكثره
ابحقّ حسين اهوه الريحانه ابهذا المحضر
ياربّ اتقبّل كل دعوانه ابهذا المحضر
يحسين ابشيمتك اتساعد شيعتك
بوم المحشر
=============
الحشر عيد ابحضور الناس مثل أعيادنه التجمع
الناس اوگوف كلها ابخوف ماتدري منو المرجع
كلمن شايل اذنوبه ويدوّر منهو الينفع
الكل خايف اويتراجف وما كو عين ماتدمع
يصدر أمر الباري وبرهانه الحبّ الهادي
وتشخص أنظار الولهانه الحبّ الهادي
تفداك امتك اتساعد شيعتك
يوم المحشر
=============
وتجي تشكي ابذاك اليوم حزينه فاطمه الزهره
بديها اچفوف ابو فاضل وعلى العباس تجرحسره
تنادي يا إله الكون احسين ابني انگطع نحره
ثلث تيّام مادفنوه وبالخيل انطحن صدره
والموقف تتضاعف أحزانه الصوت البضعه
والنار اتفوّر غضبانه الصوت البضعه
بحق امصيبتك اتساعد شيعتك
يوم المحشر
===========
صعب يوم الحشر مُرهب او كلمن يشكي اذنوبه
الكل ايصيح يامعبود منّك أطلب التوبه
كل غيبه وكل كذبه على الإنسان محسوبه
لكن شيعة الكرّار حبيب ايوافي محبوبه
للجنّات اتطب فرحانه شيعة حيدر
كل مؤمن مسرور ابّستانه شيعة حيدر
من اتطب جنّتك تساعد شيعتك
يوم المحشر
===========
يشيعي ادخولك الجنّة يريد الها كثيره اعمال
أصول الدين معروفه الهادي بيها وصّه وگال
حبّ الله وأهل البت اوخُمس إنچان يملك مال
صلاة اوصوم وحسن اخلاق وعلى دينه يدير البال
لا تمشي اويه الگوم الخسرانه اتحذّر منها
عوف النكرت بيعة مولانه اتحذّر منها
نعادي العادتك اتساعد شيعتك
يوم المحشر
===========
يبواليمّه امن أصل گبري وتخلّت عني خلاّني
أريدك ليلة الوحشه إذا منكر تولاّني
تساعدني على اجوابه وكت يتلجلج الساني
وماظنّي يبوالسجّاد إبذيچ الساع تنساني
يحسين انته الجدّك وصّانه الزاير گبرك
لا متمسّ النار الجثـمانه الزاير گبرك
تجاره ازيارتك تساعد شيعتك
يوم المحشر
=============
إلهي سيدي ومولاي الدّنيه ضاگت اعلينه
صار إرهاب وگطع ارگاب المؤمن حاير ابدينه
وين انروح وين انفر القوّه بيد عادينه
يغايب طالت الغيبه متى تظهر يمهدينه
يايوم التظهر يامولانه يبن الزهره
جدّك بالطفّ حرگوا صیوانه یبن الزهره
عجّل ثورتك اتساعد شيعتك
یوم المحشر
**************** تمت