رديلي ابسلامه يمن عندج يتامه
شخصج غاب عنه يثريّة نزلنه
ردّيلي ابسلامه يمن عندج يتامه
* * *
اصيحن وين يحبيبتنه رحتي
على حالة احبابج ما نشدتي
ييمه الفركتج ذابت مهجتي
من شم الهوه يمه انحرمتي
تركتيني كئيبه ييمَه يالحبيبه
بعد ردتج ظنه يثرية نزلنه
رديلي ابسلامه يمن عندچ يتامه
* * *
ضاعت علتج يمه علينه
رحتي ابساع يحبيبه من ايدينه
ما ننسه الحنان البيه ربينه
عليج ايهون يمه اتفاركينه
صعب يحبيبه فركاج ييمّه وين نلكاج
رحتي اشلون منه يثرية نزلنه
ردّيلي ابسلامه يمن عندچ يتامه
* * *
اون اعليج يم ضلع المكسر
بالسمار اظن صدرج اتعوّر
من ظيم العدو حالج تمرمر
حملتي الهظم يمه و الهظم مر
صعب فكدج عليه يمن عندج ابنيه
انكطع منج أملنه يثرية نزلنه
ردّيلي ابسلامه يمن عندج يتامه
* * *
يحبيبه ابحنانج ما تهنيت
ييمه ألهج ابإسمج و ناديت
يا ريحة الجنه و شمعة البيت
اتعوفيني يالحبينبه ما ظنتيت
أصيح ابصوت يمه عليه الدار ظلمه
نهاري ليل جنه يثرية نزلنه
ريلي ابسلامه يمن عندج يتامه
* * *
يم كبرج كعدت او صحت يُمَه
لرش كبرج من ادموعي و اشمّه
دحاچيني يالحبيبه ابچلمه
شيصبر الكلب و يزيح همه
يون كلبي الخايب على افراك الحبايب
ونه ابأثر ونه يثرية نزلنه
ردّيلي ابسلامه يمن عندج يتامه
* * *
مر جم يوم وجهج ما لمحناه
او صوتچ يالحبيبه ما سمعناه
يوسفه طول المعدل فكدناه
تره إسمچ عزيز او ما نسيناه
رحلتي يالحنينه ودواچ امضيعينه
واتشتتّت شملنه يثرية نزلنه
ردّيلي ابسلامه يمن عندج يتامه
* * *
تمنيت اكعد ابكترج و احاجيج
واخبر شنهو ابكلبي و ابجيج
ضاعت علتج معرفت أداويج
كله من كسر ضلعج الماذيج
رحتي ابكلب مهظوم و صدرج ينضح ادموم
كسر ضلعج هظمنه يثرية نزلنه
رديلي ابسلامه يمن عندج يتامه
* * *