يَخْوتي راح ابونه راح من طلع يصرخ الجرّاح
وا إماماه واعلياه
* * *
زينب حزينه الليله منفجعه يم راس ابوها تذرف الدمعه
أحنت عليه واتحب إيديه
بفراگه حسّت گامت اتودعه اتگله علينه ضاگت الوسعه
اتهدم السور وراح السرور
ذل اليتم بويه علينه لاح
* * *
ما نحمل اغيابك يبو الحمله واليتم بويه صعب ما حمله
مُر الفراگ والصدر ضاگ
صبري يگلها ومدمعه ايهلّه ساعه وتمدوني على القبله
ساعة وداع رايح الساع
يستلم روحي قابض الأرواح
* * *
تسعر ابگلبي نار دمعتكم واتعزّ عليه بويه فرگتكم
ابيشوگ اونين ودمعة العين
گلبي يودكم واحب شوفتكم وادري عگب عيني اشحالتكم
رغم الحنين وتعب السنين
بوجودكم تعبي أبد ماراح
* * *
عندي وصيه بويه سمعيها بالطف اخوتج من تفگديها
ابحرگ الخيام لمي الايتام
مني تحيه بويه بلغيها اعلى اجساد أخوتج من تمرّيها
بلغي السلام الذيج الاجسام
المعطره ومنها المسك فواح
* * *
جني أشوفج بويه بالكوفه ابلمّة حرم وايتام مكلوفه
هذا يصيح وذاك جريح
وروس اخوتج برماح مصفوفه اتعوفين اخوج امگطعه اجفوفه
ايظل الكفيل بالطف جديل
وحسين جثته اموذره برماح
* * *
اتگله يريت الموت أخذ عمري وانت الذي اتوسدني ابگبري
چان استريح ابنوم الضريح
آنه الهظمني الدهر من صغري ضلع امي كسروه ودماه يجري
ظليت أصيح ودمعي يسيح
ابعطفك عليه بويه گلبي ارتاح
* * *
گلها يزينب لابد اتشوفين شمر الضبابي يحز نحر حسين
ايموت ابظماه وينزف دماه
و راسه يرفعه فوگ راس اردين وعباس اخوج ابجثته اتمرين
مبري الزنود و يمه الجود
بلغيه سلامي عالنهر لو طاح
* * *