من شفت نعشچ سار يا يمه ناديت
والدمع هليت
فكد الحبايب نار يا شمعة البيت
* * *
يم الحسن وحسين رحتي امن ايدينه
نعشچ مشه بالليل واتكدرينه
أنشد و اصيح ابصوت كبر امي وينه
يمه الحنينه ما ظن تجينه
ثاري الدهر غدار يا شمعة البيت
رحتي يبعد الروح وانشده بالى
مكدر أصد للبيت موحش او خالى
يحبيبه ما ظنّيت أفكد دلالي
يمه اشجرالي ابسود الليالي
عصروج اباب الدار يا شمعة البيت
* * *
كسر الضلع آذاج لو سطرت العين
هالكسر خله اجروح مو جرح جرحين
يايمه ضاع ادواج من هجمة البين
يمه اشتهجسين ومنه توتين
ابصدرچ مضه المسمار يا شمعة البيت
* * *
فكدج ترك بحشاي يحبيبه جمره
ماتطفه نارج دوم من يوم السطره
ما طبك جفني ابنوم والعيشه مره
الضلعج و كسره حسره اعلى حسره
افراك او حزن و اكدار يا شمعة البيت
يوم الفراك امنين صكني و إجاني
يا يمه دهري اعليج بلوه بلاني
فكدج ينور العين هدم كياني
يمه زماني منج خلاني
ظل الكلب محتار يا شمعة البيت
* * *
اصفن و أحاچي الروح والعين عبره
تصبر يكلبي اشلون ماتت الزهره
خالي مسه المعمور والدار كفره
بضلوعي جمره وابصدري حسره
الهج ابليل انهار يا شمعة البيت
* * *
من جنتي اتونين يمي و اسمعج
چنه انكسر بالباب ضلعي وضلعج
و ظل يجري من العين دمعي او دمعج
جيتج الكبرج ابهمي أخبرج
صار الشمل طشار يا شمعة البيت
* * *
يايمه ليل انهار الهج ابإسمج
فتحي الكبر فتحيه واخذيني يمج
ابكلبي انجمع همين همي او همج
هاللحد ضمج حارمني منج
ما ادري بيج اشصار يا شمعة البيت
* * *
اشلون الصبر و العين مدمعها يجري
نار الضلع و الباب بضلوعي تسري
يا يمه ما أنساج يابعد عمري
دوهني دهري ماجنت أدري
عمر الورود اكصار يا شمعة البيت
* * *