علي الاكبر
علي الاكبر
إلكد على الخيل يا نجمة اسهيل
انسى التعب انسى الظما تضيفك الزهره فاطمة
يا نجمة اسهيل
*******************
من صوّل الاكبر علي سيفه جدح نار
تتشارد منه ابكل كتر عصبة الاشرار
ينادي انا ابن احسين ابن حيدر الكرار
راواهم انجوم الظهر وذرهم اوذار
ظل يحط وايشيل راواهم الويل
واحسين ابوه ايحشّمه تضيفك الزهره فاطمة
يا نجمة اسهيل
********************
بكر ابن غانم من برز مترهّي مغرور
واحسين يتابع حملته شاف ابنه مخطور
نادى يليله دعوتچ تدفع المحذور
دخلت الخيمه تندعي والدمع منثور
صاحت يمناّع رد ابني ابساع
يحفظك إلي رب السما اتضيفك الزهره فاطمة
يا نجمة اسهيل
*********************
اتجاول علي ويه العدو ابضربه على الراس
راس ابن غانم من وگع رد راعي الباس
للخيمه الاكبر من رجع مبهوظ الانفاس
اينادي يبويه امن الظما روحي على اخلاص
وابگطرة الماي يرجع لي اگواي
يگله ويقبله ابمبسمه تضيفك الزهره فاطمه
يا نجمة اسهيل
****************
يبني دگلي امنين اجيبن شربة الماي
چبدي مثل چبدك تشب لاچن يرجواي
هذا لساني اليلتهب مضغه اوبعد هاي
ارجع الأمك تنتظر جيتك يمنواي
رد لمّه مشتاگ الها امن الفراگ
صاحت مسيرك تممه تضيفك الزهره فاطمه
يا نجمة اسهيل
*******************
ليله الحزينه من الوله شبگت ولدها
تدريه رايح للأبد واتظل وحدها
تگله الشهاده رادتك تروه بعدها
للزهره قدمتك هديه امك اشعدها
گلب امك ايگول ريّض يمدلول
اتناديه واعليها انغمى تضيفك الزهره فاطمه
يا نجمة اسهيل
********************
ودّع ابيّه واتّجه حومة الميدان
غاضب شطرهم عن يمين يسار جنحان
گالوا علي الكرار إجه فارس الفرسان
والعبدي صك راسه ابعمد وانضهد نحلان
بيه الفرس مال واتگطع اوصال
من جاه ابوه اعليه ارتمه اتضيفك الزهره فاطمه
يا نجمة اسهيل
********************
تمدد ابطول ابنه وحط خده اعلى خده
من شافه امگطع اوصال انمرد جبده
رد گام جمع جثته ولفه اببرده
ما يگدر يشيله وما ظل حيل عنده
نادى يشبان من گلب لهفان
شيلوا علي لمخيّمه تضيفه الزهره فاطمة
يا نجمة اسهيل
*****************
تمت