فاطمة الكبرى ابنة الحسين (ع)
ونينـي ونيني للمشـوا والبعـد وارآهـم
حنينـي حنيني للی گلبـي راح ويّــاهـم
الوعد عمّي يجيلي مسهره طال ليلي
حنيني للّي گلبي راح ويّاهم
÷÷÷÷÷÷÷÷÷÷
مشوا عني وبگیت احسب الأيّام وحسراتي ثجيله
كل ساعه التمرني چنها أعوام أون مابيدي حيله
ساعاته طويله الليل مـانـام منهو الأشتـكيله
وأگضي الليل كلّه سـهر وآلام وانا روحي عليله
ياليـل ياليل الفراگ اســـــــودّت أيّـامي
يالـيل ياليل اشعلامك تسعي بعـدامـي
شيصبـّر دليلي مسهره طول ليلي
حنيـني للي گلبي راح ويّـاهم
÷÷÷÷÷÷÷÷÷÷÷÷
أريد أگـعد على درب اليـمرّون وأسد بيبان دوري
أناشد كلمن إيروحون ويجـون عن رحلة إبدوري
أنذر نذر وادي البيه يمشـون أزرعه ورد جوري
يوم البيه أحبـابي علي يلفـون أعلن بيه سروري
أظنهم أظنهم ماوصلهم عتبي واكتـابي
حزنهم حزنهم مرد روحي وزيّد امصـابي
يدمعاتي دسيلي مسهره طول ليلي
حنيني للّي گلبي راح ويّاهم
÷÷÷÷÷÷÷÷÷÷÷÷÷÷
أناجي الگمر شايف صفوة الدّين الشالوا عن وطنهم
ماتدري ابظعنهم گاصـد الوين اشعنـدك خبرمنهم
أنشدك ياگمر عن والدي حسين مثل گمره ابظعنـهم
گالوا للعراگ الأهل مـاشـين ميعـودون أظـنهم
أنـادي أنادي وصرختي مـاتوصل أحبـابي
يحادي يحادي وين مـاشي ابظعـن غيـّابي
أنادي ونزل حيلي مسهره طـول ليلي
حنيني للّي گلبي راح ويّـاهم
++++++++++++
گمت أزرع أماني واحصد اليأس وأشتلها ابروحي
تمنّيـته يجي عمّـي العبــاس ويبلسم إجروحي
وأروح اوياه لبويه رافعه الرّاس واطفي جمر موحي
شوگي ولهفتي إلهم متـنقـاس يشهد بيها نوحي
نحيلـه نحيله وعايشه روحي ابـذكـراهم
عليله عليله والمرض سبـّب لي فركاهم
من الفرگه يويلي مسهره طـول ليلي
حنيني للي گلبي راح ويّاهـم
÷÷÷÷÷÷÷÷÷÷÷÷÷÷÷÷
يفـزگلبي الهوه لو حرّك الباب أگول أهلي لفوني
ماأدري الهـوه والباب چـذّاب وأهل گلبي نسوني
إخذ لهلي سلامي ياهوه الهاب إنشدهم متى ايجوني
ما ردلي خبر منهم ولا اكتاب ابيوم الفـارگـوني
إعيوني اعيوني امشوبحه للدّرب واتنـاهم
يجوني يجوني وتبتشر روحي ابملگـاهم
مته يسكن عويلي مسهره طول ليلي
حنینی للّي گلبی راح ویاهم
÷÷÷÷÷÷÷÷÷÷÷÷÷÷÷÷÷
كتبت اكتاب مملي ألم واعتاب على فرگاك يحسين
الوعد يلفيني طارشكم يغيّـاب يابويه الوعد وين
إعلى جيّتكم أفرفح والأمل خاب چنها سفرة البين
حرمني النوم فرگاكم يالحبـاب وعليكم شابحه العين
حرمني حرمني الدهر شوفتـكم يوليـاني
سگمني سكمني ابفرگة أحبابي اوخـلاّني
عليله ورگد حيلي مسهره طول ليلي
ونيني للّي گلبي راح ويّاهم
÷÷÷÷÷÷÷÷÷÷÷÷÷÷÷÷
العليله تعتب وماتدري اشراح بالطف امن أهلها
أبوها وعمها راحوا فرد مصباح محّد سلـم إلـها
أجساد امطرّحه والروس برماح ابسهم فطموا طفلها
ردّ الظعن خالي ابلطم واصياح حرم فگدت أهلها
يعـمّه يعمه وين أبوي حسين واخوانه
مظلمه مظلمه ابيوتهم والـدار خلـوانه
يعمـه عددّيلي مسهره طول ليلي
حنيني للّي گلبي راح ويّاهم
÷÷÷÷÷ تمّـت ÷÷÷÷÷÷÷