فاطمة الكبرى
فاطمة الكبرى
يوم الظعنكم سار انگطعت الاخبار
يامن جفيتوني ابمرسول وعدتوني
وانگطعت الاخبار
***************
سار الظعن عني رجعت وعبرتي ابصدري
چني رجعت ابحفرتي واتوسدت گبري
راح الامل ويا الاهل ايردولي ما أدري
سنين العمر كل ما تمر تحرق شذا عمري
لا خبر لا مكتوب گلبي ابناره ايذوب
يهلي نسيتوني ابمرسول وعدتوني
وانگطعت الاخبار
*******************
طال السفر روحي ابخطر والمرض هد حيلي
انحب واون وامن الحزن سهرانه كل ليلي
حتى الطفل عني ارتحل يا عيني دم سيلي
يم المهد كلما اصد اذكر يناغيلي
ظل المهد تذكار والحادي بيكم سار
رحتو اوفجعتوني ابمرسول وعدتوني
وانگطعت الاخبار
******************
اتمنى يابويه تجيني جملة الاحباب
ليلي ونهاري انتظر واعيوني اعلى الباب
ما ادري البيكم سده خبروني لو بكتاب
يابويه ذكروني ابخبر منكم اريد اجواب
ما جانت ابالي ابگى ابنزل خالي
وحدي هملتوني ابمرسول وعدتوني
وانگطعت الاخبار
******************
ودت رساله للأهل ما تدري بيهم وين
لاچن على اجناح الامل خذها بريد البين
وصلت رسالتها ابيوم الظل وحيد احسين
يقرا الرساله للحرم ومنّه تهلّ العين
تگله ابدمع مدرار بيكم يبويه اشصار
چنكم ذبحتوني ابمرسول وعدتوني
وانگطعت الاخبار
*******************
سلامي لعمي بوفاضل وعدني كون الي يحضر
وعمتي زينب وامي واخوي الغالي الاكبر
وحب خد الطفل عني على فرگاه ما اقدر
بسلامتكم تبشروني يريتك سالم امن الشر
اناطر والدمع هامي وگلبي امن الحزن دامي
ابدن ما ذكرتوني ابمرسول وعدتوني
وانگطعت والاخبار
******************
اخذ الكتاب الى الحومه ينادي والدمع يسجم
يا عباس يالاكبر عليكم فاطمه اتسلم
اجه يم الطفل شاله رگبته امخضبه امن الدم
يگله تسلم الكبرى عليك وبيك ما تعلم
تنادي ابدمع مدرار يا صفوة الابرار
انا اشذنبي هجرتوني ابمرسول وعدتوني
وانگطعت الاخبار
******************* تمت