فزاعيه
يا كـربـله عفنـه الجـثث
عـفـنـه اجـسـاد وليـانـه
* * *
عفـنـه اجساد امـطـرّحـه
ابليّـه دفـن بـالـمـذبـحه
تنزف دمه و امـجـرحـه
يا كربله كومـي ابـدفـن مـوتـانـه
* * *
عفنه الحسين اعلى الثـّره
جثـه و اضلـوعـه امكسره
و دمّـه نزف من منـحـره
سـهـم المثـلث بـالكـلب نيـشـانـه
* * *
يا كـربـله عـفـنـه الأهل
و حسيـن ظـل ابـلا غسـل
من الراس جسمه منفصل
و الخيـل داست جثتـه ابميـدانـه
* * *
يا كـربـله عـنـدج خـبـر
بالغـصـب مـشـونـه يسر
جـم شـاب ظـل ابلا كبـر
و امّـه مشت عنّـه وعليه حزنانه
* * *
مـرّيـنـه مـن شـفـنـاهــم
عـالـهــزل ودّعــنــاهــم
ابـليـّـه دفــن عـفـنـاهــم
ردنه نظـل و الحـادي ما خلانــه
* * *
راعـي العلـم يـم النـهـر
راسه ابعـامـود انـشـطـر
كل إيد مـشـمـوره ابكتـر
اعلى الماي وسفه اتكطعت ذرعانه
* * *
الأكبـر وكـع بـالمعـمـعـه
جابـوه جثـه امـكـطـعـه
كلنه انفجعنه ابمصرعـه
اسيوف و خناجـر وذّروه عدوانـه
* * *
العـرّيـس طـفّـوا شمعتـه
مـن دم جـبيـنـه حـنّـتـه
للـعـركـه صـارت زفّـتـه
جاسم عزيز من الحسـن ريحانـه
* * *