في دفن الحسين (ع)
في دفن الحسين (ع)
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
جيت لحسين أدفنه اشصار بيّه
بلا راس ا بشمس فوگ الوطيّه
دهتني چم مصيببه على اليدفن حبيبه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
والدي شلته إعظام مجموعه
امن إيدي تتساگط امكسّره اظلوعه
وحدي نزّلته وروحي مريوعه
صورته للساع ابعيني مطبوعه
ابگبره مدّيته وعليه إنهد كياني
لاكفن لاراس لن صوت إبأذاني
إلي طفلي دجيبه على اليدفن حبيبه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
والطّفل جبته امطوّگ ابسهمه
الرّگبه مگطوعه امخضّب ابدمّه
يمّه خليّته وللصدر ظمّه
وإصبعه مگطوع إچفوفه موُ يمّه
ود وّرت چفّين مگطوعه وجبتها
ذاب گلبي على اذراعه ركّبتها
مصايبنه عجيبه على اليدفن حبيبه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وجيت للأكبر ضربته خطره
اسيوف عدوانه خلّته وذره
من إجاه حسين ظمّه الصدره
ابلاكفن لكبر نايم ابگبره
وجاسم الحومه محتفله ابزفافه
راح عمّه ايجيبه إبساعة هتافه
رجع عالي نحيبه على اليدفن حبيبه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وحفرة الأنصار يمّ ابو اليمّه
كل فرد منهم مرجله وهمّه
باعوا الدّنيه الكل بذل دمّه
وگف أبّنهم كلمن ابإسمه
واگف اينادي وادموعه جريّه
وحدي عفتوني برض الغاضرية
ابها الساعه الرهيبة على اليدفن حبيبه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اشسوّت ابعمي عصبة الكوفه
بالعمد ضربوه الهامة مخسوفة
مزّقوا جوده وگطعوا اچفوفه
وهوه حملا ته بیهم معروفه
خاض ماي النهر ظامي اوعافه
يدري بحسين الظمه يبّس اشفافه
أسد طاهر حليبه على اليدفن حبيبه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
دفنت أحبابي وروحي منفجعه
وجيت للعيلة ابحالة السّرعه
ولنها عمتي اتصيح وتذرف الدّمعه
إدفنت ابوك احسين السلّبوا درعه
گلّي چفّنته بيش المات عاري
گلها چفّنته ابگطعة بواري
ترى الحاله كئيبه على اليدفن حبيبه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
تمّت