الكرامة الحسينية

لطميه للأربعين

مـن الشـام يبـن امــي حرم          جـيـنـــاك زوّار

و اطـفـال كاسـرهـا اليتــم           تـنـزل ابيـا دار

ويــن الكـبـر ويــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

يحسين ولهانين جينه انزور الاحبـاب

يبن امي مسبيّين جينـــاكم يـالاطيـاب

مرّت علينه ايّام صعبه ابثـكـل المصـاب

جرح الحبل للساع يدمي بعـده ما طاب

اتلكوا حرمكم يالشيمكم          شـيـمـة احـــرار

تـدرون كـل ذيج الخيــم          شعـلـوهـن ابنار

اتلـكـوا النساويــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

ردّيت ولهانـه على احبـــابي العفتهـم

نومــه على حــرّ الثـــرى ما دفّنتهــم

عنّت عليّه اوجـوه اخـوتي اوجايّتهــم

صار اربعيــن امن الليــالي ما شفتهــم

جيت أرد أكلهم بالجـره          بالعـايـله و صـار

اويـايـه حـريـم اميسّـره          حسبـونـه خطّـار

حـطّـمـنــي البيــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

يحسيـن جيت اميسّـره روحي نحيـله

عنكم ســفرنه يخــوتي ســفره طويـله

وزيـن العبـاد من الهظم مينـــام ليــله

طول الدرب دمع الحزن عالخد يسيـله

اتحمّل إهـانـات و شـتـم          من كـوم الاشرار

أنـذال مـا بيــهم رحــم          البـيت الاطهــار

مـغـلـول الايـديــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

يحسين جبت اعيالك وجيتك حـزينـه

ما تدري يبن امــي ابمرار المَر علينــه

فزّت رقيه اتصيح ابـوي حسين وينــه

جابــولها راســك او مـاتت بين إيدينــه

ماتت الطـفـله مـن الألـم          و بحالـي اشصـار

ضجّت أطـفـالك و الحرم          تـصــرخ يسـتـّـار

مـن غمضـت العيــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

ماتت رقيــه وكابلنها الحرم بالنـــوح

وظلّت الطفله امّدده مـن فـاتت الــروح

من غسّلتها لن ظهرها شفـته مجــروح

واجتافها ابشدّ الحبل وارم يمـذبـــوح

صلّى أبوالباقر على اخته          ابـدمــع نـثـــار

بيــده دفنــها وما حصل          ويـّــاه نـغّـــــار

و جينـه محزنيــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

يحسيــن نحلانه من المصاب الدهانـي

بلوه عليــكم يخــوتي دهـــري بلانـي

شفت الكـبور من البُعد زادت احزانـي

فـكّ الكبـر خويــه وخلني ابكتر ثاني

يحسين تدري من الهظم          كلبي اشتعل نـار

مجموره من جور الخصم          قــاسيت المـــرار

مــا بــيـن نـاريــن          يبـن امـي يحسـيـن

جـيـنـــاك زوّار          جـيـنـــاك زوّار

*     *     *

 

 

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى