للأنصار
وينكم يهل الوفه زينب اتناديكم
حسين ظل وحده وعليه الجيش ملموم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حسين من خلصت اصحابه وكل أخوته وظل وحيد
وگف إيأبّن أجساد إمطرّحه فوگ الصعيد
إينادي بيهم تركتوني لا نصير اولا عضيد
ما على الميّت امعاتب خاصّه الميّت شهيد
صحت عالدنيه العفه يخوتي اشبيديكم
إنتوا وفّيتوا العليكم چان ملزوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
ياحبيب اويازهير وين نافعنه وهلال
وين رحتوا اليوم عني مابگت عندي رجال
راح عباس أبوفاضل راح شيّال الاثگال
راح اليقدّم جوادي ومنهو ايحامي العيال
راح حامل رايتي وغدر دهري بيكم
وراح مني علي الأكبر غالي السـوم
إجت ليه إخته العقيله اتگلّه ماظل لك معين
حسين خويه المن تنادي صحبتك خذهم البين
اتريد أقدّم لك جوادك على راسي وعلى العين
عندي من أمّك وصيّه گالت هذي للحسين
اتمر عليكم عاصفه ابكربله تفنيكم
عاد نفذيلي الوصيّه ابوكت معلوم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
سمع إسم امّه وتحسّر وانفعل يبچی ویگول
من عگب عينچ ييمه ضيّعوا نهج الرسول
آه يمّه مادريتي اشصار بينه يالبتول
جارت الأمّة علينه وخان بينه كل خذول
شتــتـّونه ابكل بلد اوراح اليواليكم
اليوم آنه ابكربله امن الماي محروم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اتگلّه هاك اخذ الوصيّه دفك صدرك يالحبيب
شمّته ابصدره وتگلّه خويه شح بيك النصيب
شمّته ابصدره اوضمها گلها راح ابگه سليب
یختی واتمرّين بيّه مرمي وابدمّي خضيب
هللّه هللّه ابعيلتي لومشه حا ديكم
يختي حفظيلي اليتامه من عصي الگوم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اتگله يبن امي وحبيبي وشمعتي وريحة علي
تدري ابإختك غريبه ومالها غيرك ولي
لاولد لاأخو ظل لي ايكون گلبه ايحن على
إشراح أسوّي ابها اليتامه العگب عينك تنولي
گلها صبري اعلى القضا هالعده تسبيكم
يختي واتروحون يسّر هذا محتـــــــوم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ تمّت