للعباس عليه السلام

وداعة الله يا الحبيب

اوداعة الله يالحبيب       راح الجود اومايه

للخيم ما أگدر ارجع      شـــــــگّوا الجود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

راح أبو السجاد مسرع       صوت أخوه صك مسمعه

يمشي ويلگّط اچفوفه         امن الزنود  امگطّعه

طار گلبه ويهل دمعه          يوم شافه ابمصرعه

گعد يمه اشلون گعده      انحنه اعليه ايودّعه

گلّب اجروحه وبچه        شاف اجروحه اهوايه

شاف مخ راسه امطشّر      من العـــــــــامود

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

أبو فاضل فگد شوفه       عين فاگسها السهم

وعين من فاضت ادمومه      جمد بجفونه الدّم

سمع لن واحد ابكتره         ذاب گلبه امن الألم

حسب هذا ايريد ايذبحه       اعليه بالباري قسم

خلني فد ساعةزمن          يجي اخوي اعنايه

أرد أودع حسين اخوي       الصبر مريود

حسين گلّه آنه خوك       اوحيف ياراعي الوفه

رحت من إيدي يخويه       والعدوّ بينه اشتــفه

يعباس انكسر ظهري        وبيتي اسراجه انطفه

اشلون أرد لخيم وحدي    اشلون أروح ابيا صفه

راح تنشدني الحرم           وين  راعي   الثايه

اشراح أجاوب هالعطاشه     النهر مسدود

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

راد إيشيله للخيم           گال ماروح الخيم

شعتذر للواعدتها           شعتذر من الحرم

ظلّت ابنفسي أشوفك     شيل من عيني السهم

گال هذا وغمض عينه      بساع وافاه الحتم

مات عباس البطل          مات راعي الرايه

صاح أبو اليمّه عفتني      او چنت إلي طود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

گام من يمّ العضيد       منّه ظهره منفصل

يسحب ابرجليه ينادي   راح مني بوالفضل

للخيم أگبل حزين    ايكفكف ادموعه التهل

الخيمة العباس راح     اوطيّح الخيمه ابعجل

راح راعي الخيمه       وراحت الحمّايه

صرخت الأطفال       عمنه بعد ميعود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

زينب اتلگت أخوها    صارخه وتجري الدمع

ليش ابوفاضل تأخّر       ا وياك خويه مارجع

گلهاالله ايعظم اجرچ      من ظهره مهره وگع

اچفوف ايديه امگطّعيها   وگلبي اعليه انگطع

بالعمد راسه انضرب     وما بگت لي احچايه

عفته عاشاطي رميّه       اهنـــــاك ممـــدود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ تمت