جبريل ينعه بالسّمه
انهدمت اركان الدين ويلاه يبو الحسنين
* * *
من صاح زينب سمعته ينعه أبوها عرفته
اتنادي ودمعها ايسيل
يحسين خويه يا حسن حسيت چن گلبي انطعن
يوم اسمعت جبريل
ينعه أبونه وينتحب حيدر ابراسه منضرب
ابمحرابه تالي الليل
اتصوّب علي حامي الحمه
راسه انجسم نصين ويلاه يبو الحسنين
* * *
راحوا الحسنين ابعجل إبراسه مصيوب البطل
وطايح ابمحرابه
طاح الحسين ايقبله والحسن دمعه يهمله
من شاهد اصوابه
شد الجرح بعمامته ينضح دماه من جبهته
وانصبغت اثيابه
مخضوب شيبه بالدّمه
وارتجّن الكونين ويلاه يبو الحسنين
* * *
زينب على الباب ابحذر وگفت حزينه وتنتظر
منها الگلب ممرود
تتمنه واليها الضمد ماشي لعد بيته يرد
سالم يرد اردود
حسره بثر حسره تجر عالبعد شبحت بالنظر
لن الامل مفگود
نادت ابروح الهايمه
چته فجعني البين ويلاه يبو الحسنين
* * *
حيدر ابيوم اللي وصل ناده على اولاده ابعجل
يولادي نزلوني
خوفي اعلى زينب تنفجع من اتشوفني ابهذا الوضع
أرد امشي خلوني
لن زينب اتنادي ابوجل منهو يخوتي المنجتل
بالعجل خبروني
يا ريت بعيوني العمه
هالشايلينه امنين ويلاه يبو الحسنين
* * *
گلها الحسين ودمعته تهمي يبت سر هل أتى
خطار ابونه اليوم
جرح البراسه مضهده ينرف دمه شنضمّده
خويه الجرح مسموم
صاحت ودمعتها جرت يا بويه بنتك مادرت
بيتك يظل مهجوم
امن الساع بويه اميتمه
امصيبه واجتني امنين ويلاه يبو الحسنين
* * *
راسي وراسك إنضرب جرحي وجرحك إلتهب
شيسكن اونيني
وامنين ابن ملجم لفه وصوبك بويه ابمرهفه
وگبلك فكس عيني
گلها يبويه اتصبّري زينب يبهجة ناظري
إبجاج ياذيني
اتگله يبويه امعلمه
روحي عليك اسنين ويلاه يبو الحسنين
* * *
گلها ابراسي فد جرح اشحالج بخوج الينذبح
ويمّج يذبحونه
بالخيل ايسحگوله الصدر ميظل عظم ما ينكسر
وراسه يگطعونه
ترحين ويه العائله للشام ويه حرمله
اشحالج يمحزونه
صاحت يراعي الغانمه
فرگاك يعمي العين ويلاه يبو الحسنين
* * *