تنتظر زينب يرد واليها
راح ايصلي الفجر و ايرد ليها
* * *
واگفه بالباب زينب تنتظر
ايرد ابوها عگب ما ايصلي الفجر
خايفه يفجعها بالوالي الدهر
لنها تسمع بالوحي ايعّزيها
* * *
واگفه تنتظر و المدمع يسير
لن صرخ جبريلها ابتالي الليل
انضرب راس المرتضى فارس الخيل
و بعد زينب تبشر ابتاليها
* * *
بعد إلها وگفه زينب تنتظر
يوم عاشر من رجع ليها المهر
رجع يصهل سابح ابدم الطهر
الله يدري اشصار زينب بيها
* * *
راحت العركه تنادي يا حسين
وين طايح خويه يا گرة العين
خويه دليني طحت يحسين وين
خويه عفت العايله امسلبيها
* * *
خويه شبّوا نار بخيامك الگوم
و آنا بين النار و اطفالك أحوم
نوب أطيح اعلى الثرى و نوب أگوم
اعيالكم خويه العده امطشريها
* * *
من سمع زينب المحزونه تصيح
صاح هاي آنه يبنت امي جريح
ثلاث مرّات انتهض خويه و اطيح
اشلون اگوم و چبدتي اموذريها
* * *
اجت يمه و لنّه اعليه انغمه
شافته لن سابح ابفيض الدمه
اتگله حاچيني يبن حامي الحمه
ادري ظامي و روحك امعذبيها
* * *
فتح عينه و گال ردي للخيم
خويه باريلي اعيالي و الحرم
اتگلّه حرگوا كل خيمنه و انهدم
سورنه و نهبوا أسباب البيها
* * *
