كوم وشــوف محنتنـــه
يعــامـــــود خيمتنــــه
* * *
يا بو الفضل وَيْ روحتك طاحت اخيـام العايلـــه
تتصارخ أطفــال وحــرم آيــا مصيبـــه كربلــــه
اسمع صوت صرختنـــه
يعــامـــــود خيمتنـــه
* * *
عباس خويــه ابطيحتك ظل يعصر ابكلبي الألـم
والعمد من صــك هامتك طاحت عواميــد الخيـم
وكعت حيــف رايتنـــه
يعــامـــــود خيمتنــــه
* * *
من رحت منـه يا كـمــر وانكطعت اجفوف المجد
الأطفال تصـرخ بالخيــم عبـاس عمنــه ما يـــرد
نـــار الظيــــم لهبتنــه
يعــامـــــود خيمتنــــه
* * *
يمّ جثّتك طــاح العــزم من حين ما طاح الّلــوه
واجفوفــك المتكطّعــــه ويّــاهن افّــادي التــوه
هالجفّيــن كســرتنـــه
يعــامــــود خيمتنـــه
* * *
كل جف من اجفوفك وكع بعيـونـي صار الهن أثــر
وسهم الفكس عينك تــره بيه ظهر الحسين انكسـر
سهــم العيــن شتّتنـــــه
يعــامـــــود خيمـتـنـــه
* * *
شايل الجود او مهجتـك مـن العطش تسعر جمـر
اتوصّل المــــاي العيلتـك فرحـان جاي مـن النهـر
آه اشلـــــون لهفتنــــه
يعــامــــود خيمتنــــه
* * *
هالجود جـــان ابنيّتــك تسكي اجبــود الظاميـه
وابهالسهـم خاب الأمـل وظَلَّت ادموعـك جاريـه
ادمـــوع العين حركتنـه
يعــامـــــود خيمتنــــه
* * *
حركتنـي نـارك يالبطــل نارك ما يطفيـها الدّمــع
حنّيت من طــــاح الّلــوه وشريان من كلبي انكطـع
تسعــــر نـار جمرتنـــه
يعــامـــــود خيمتنــــه
* * *