زينب ومصائب كربلاء
عفنــه اجســاد وليانـــه
بـس الـــروس ويانـــــه
* * *
مشينـه مـن طف كربلــه غصباً علينه اويـه العـده
وعفنه أهلنـه ابلا دفــن بالشمس كلهـــا امــدّده
بالدمـــــوم غركـانــــه
بـس الـــروس ويانـــــه
* * *
مرّينه مـن ساكـوا الظعن شفنه أهلنـــه مــن بُعــد
ردنـه انودّعهـــم فقــط كالـوا ميرضـه بن سعــد
أبـــد مـــا خلاّنـــــه
بـس الـــروس ويانـــــه
* * *
ليلـه اتنـــادي ياعلـــي أمك على ظهر الجمــل
آنــا مشيــت اميسّـــره وانت على الرمضا تظـل
روحي اتفـــور حيرانــه
بـس الـــروس ويانـــــه
* * *
تنشد رباب امن الحــرم ما شفتوا ابني ابيا كتـر
يا ريت اشوفه من بُعــد جمـرة افراكــه تستعــر
طول الليـــل سهرانـــه
بـس الـــروس ويانـــــه
* * *
رملـه الجاســـم نادتـــه راسك اكبـالي اعلى الرمح
كلمــا أصـد الشوفتـــك ينفتك مـن كلبـي جــرح
أمـــك دوم حزنانـــــه
بـس الــروس ويّانــــــه
* * *
زينب حزينـــه تلتفــت كلساع يـم راس الكمـــر
اتكله يخويـــه جثتـــك ظلت على شاطي النهـر
زاد اعليــــك بلوانـــــه
بـس الـــروس ويانـــــه
* * *
يابو الفضل وي طيحتـك سور المجد طاح وهـــوه
وحسين طيّــح خيمتــك من نار كلبه اللي انجوه
بيــك حسيـن عزّانــــه
بـس الـــروس ويانـــــه
* * *