عثرة المهر – لليوم الثالث
عثرة المهر – لليوم الثالث
يحسين مهرك من عثر تراوتلي بيها اعلوم
هالعثره تاليها خطر واتروح منا انجوم
من تنزل ابهالدار شتسوي الاقدار
**************
مهرك عثر مدري قدر لو عثره بيها البين
ابيوم اطلعت من الوطن ما نشف دمع العين
خويه وبعد هذا شهر عاشور اله يومين
هلاله كدر چنه الخطر يبرا الك يحسين
يحسين اجيت ابهالظعن ما تدري وين اتفوت
بانت علامات الحزن هالگاع بيها الموت
خوفي تظل محتار شتسوي الاقدار
***********************
گلها ودمع عينه يهل ادري الامر مخطور
ترضين اصافح هالعدو وامشي اله مخفور
لو أنزل ابهاي الارض تتذبّح النه ابدور
چني اشوف ابكربلا محفوره النه اگبور
يختي العدو ماسك طرف خيرني بين اثنين
لوني أسلّ سيف الشرف لو اخضع للنذلين
وانا بعد شختار شتسوي الاقدار
*****************
حاشا اذل لكن أسلّ سيفي ابرضا المعبود
ثورتنا لازم تنتصر بس الصبر مريود
من يوگع ابشاطي النهر عباس راعي الجود
ويردلچ الاكبر جسد جاسم ابد ميعود
بدلة زفافه تنخضب يختي ابفيض ادماه
وامه تجيله وتنتحب سلّيها عن فرگاه
يختي الچ مشوار من تلعب الاقدار
****************
يختي القضا جاري علينا وانكتب باللوح
تالي تعوفيني جسد فوق الثرى مطروح
وراسي على راس الرمح للشام اوياچ ايروح
تگله عسى عيني العمى ولا شافتك مذبوح
من هالحچي كلبي اجرح خويه ارداموت اوياك
ولاشوف راسك عالرمح بيه يلعب العاداك
يظل الدمع مدرار من تلعب الاقدار
********************
وانجان الك نيه تحط خويه الظعن بالحال
نصبوا الخيم يم النهر لا تعطش الاطفال
عندك اطفال وعايله وتدري العطش چتال
والعدو ما يرحم ابد لو انعكست الامال
ابعيني اباري عيلتك واتكفل الايتام
اتمنى عمري فدوتك ريت العمر لا دام
تدري العدو غدار شتسوي الاقدار
***************
خويه عرفت اللي ردت ومنكم گطعت الياس
چنكم ودايع وانفجع بيكم يراعي الباس
يروح الخدر وامشي ابيسر عگب البطل عباس
افراگ وحزن غربه ومحن نمشي اويه الارجاس
اشلون اقدر امشي وجثتك تبگى على التربان
يبن امي صعبه اوصيتك ريت القدر لا كان
منهو اليطفي النار من تلعب الاقدار
************************* تمت