النبي (ص)

أريــــد الـمـــوت          ويـــاك يلـفـيـنـي

يـا بـويــه النّــور          لوغـاب من عينـي

شلـي ابدنياي          يضـي عينــاي

*     *     *

يريت الـمـوت ياخـذنـي          يبـويـه مـن كبـل مـوتـك

شسوّي مـن اصـد بالعيـن          واشـوفـن خاليه ابيـوتـك

تمـرنـي كل صبـاح وليـل          يوسفـه تخـرب اسموتـك

تنـادينـي يبـعـد اسـمـي          ويفـز كلبـي على صـوتـك

تـجـي عـالبــاب          كليـوم تحيّـيـنـي

مـسـه و مصـبـاح          بالخير تمـسّينـي

اشلـون ابهـاي          يضـي عينــاي

*     *     *

 

أفـكّـر مـن بعــد عينـاك          يـا روح التـظـل عـنــدي

روح التـلهـج ابـإسـمــك          لـو روح التـبـث وجـدي

سـاعـه التـبـتـعـد عـنـي          تـظـل العيـن تستـجـدي

أحس ماي الحياة ايجف          ويهـل دمعي علـى خدّي

انـجـان البـيــــن          مـاراد يـطـويـنـي

يـظــلّ الـشــــوك          لـذعـات يجوينـي

يلـذع احشـاي          يضـي عينــاي

*     *     *

لعـد صـدره النبي ضمـها          ويكـلـها يا بعـد روحــي

إصبـري والصبـر مـريـود          ابصبرج ضمدي اجروحي

تـكـلـه بـويـه وعيـونــك          بعــدك مـا أفــك نـوحي

لخـلّـي الحـزن جلبـابـي          واسيل الدمـع من موحـي

و اكـــل للـــرّوح          بالنـوح سعدينـي

و أنخـي الـمـوت          يا مـوت ودّينــي

لـعــد مـثـواي          يضـي عينــاي

*     *     *

مـسـح بيـده دمـعـتــهـا          يكـلـها وخنكـتـه العبره

عكـب عينـاي تنهظـمين          عليــج الخـصـم يتـجــرّه

بيــن البــاب والحـايــط          يبـويـه ضلعــج ايكـسـره

و بـالأسيــاط تنـهانـيـن          و عـلامـه ابخدّج السطـره

تــره اليــاذيـــج          تـدريـن يـاذينـي

تـكـلـه الـمـــوت          ويــاك يكفـيـنـي

عليـك ابجــاي          يضـي عينــاي

*     *     *

يبـويـه و راسـك الغالـي          عليـك الـروح مـشـتـاكـه

وتدري بالحبيب اشلـون          يبـويـه يصعـب افـراكــه

الكبـرلـو غـيّـبـك عـنـي          دكـلـي ويـن نـتـلاكـــــه

أظـل انحب على فركـاك          و اهــل ادمـــوع دفّـاكــه

أشــوفــك ويــــن          من حين تجفينـي

ألــم فـركــــــاك          لو طـال يشجينـي

ابث شـكــواي          يضـي عينــاي

*     *     *

يكلها اتـصـبّـري بـعـدي          على هضمـج يا محزونـه

يجوج اهل العناد ابنـار          لعـد بـابـج يحـركـونــه

وعـلـي الكـرار يتـقـيّـــد          ابحبـل واعـداه يجرونـه

وجنينج يوكع اعلى الكاع          السبب هـمّـا اليقـتـلونــه

تـكـلــه اشــلــون          للـنــوح تخـلّينـي

الوصـي مـجتـوف          من عـاد يحمينــي

من إيد اعـداي          يضـي عينــاي

*     *     *

يكـلـها اوداعـة البــاري          روحـي وصلت النحــري

يمهجـة روحي اشبيـدي          عليــج امـقــدّر اليجـري

تجيني امكسره اضلوعـج          و عليــج اتـألّــم ابكبـري

كصيـرة عمـر مجـروحـه          ابصـدرج يا بعـد صـدري

بـعـــد أيــــــــام          واليـال تلحكـينـي

الــوداع الـمـــوت          يا بـويـه ودعينـي

تـعـالـي جـاي          يضـي عينــاي

*     *     *