الكرامة الحسينية

باب الزهراء أم بوابة الشام

بابيــن راواني الدهر             من جور الايام

واحد ضلع لمّي كسـر             والثاني بالشام

ألمنـي المصــــاب      لوعني جم بـــاب

من جور الايـام        من جور الايـام

*     *     *

بابين شفت آنا ابحياتي ومرمرونــــي

واحد انعصرت بيه أمي ويتمونـــــــي

والثاني باب الشام بالسوط اضربونــي

يمه ثلاث ساعات واكثر وكفونـــــــي

ويمّي حرم تشكي الألم           واتصيح الايتام

كفّوا الضرب كافي ظلم             كفّـــوا يظلاّم

منّي الكلب ذاب     لوعني جم باب

من جور الايـام        من جور الايـام

*     *     *

بابيــن أوّلهم بدت بيه المصــــــايب

جتّفوا حيدر وافكدت أغلى الحبـايب

وبوّابة الشــام الشفت بيهـــا النوايب

جم فجعه بيها شاهدت والوالي غايب

ريت الأجل خذني كبل             صخرة أم اهجام

كلبي التهب يوم انضرب            حجة العــــلاّم

جن كلبي انصاب        لوعني جم باب

من جور الايـام        من جور الايـام

*     *     *

وينك يحيدر ما تجي اتشوف اشدهانه

باب اللـي يمّه جتّفوك اهل الخيــانـه

عوّد ابصـوره أبشع اوأكثر إهـــــــانه

امجتّف علي يمّه انضرب بالخيزرانـه

صابر وكف باجي السلف            والصبر إلهــــام

يتلي الذَكر حمد او شكر             عن الحجي صام

والكلب لهّاب        لوعني جم باب

من جور الايـام        من جور الايـام

*     *     *

يوم الوصلنه الشامهم سوّوا لهم عيــد

بدفوفهم واطبول إجونه عصبة ايزيــد

جابوا احبال اوربّطونه امنيد لي إيــد

واحنه تعابه من المسير او حال المجيد

ذلّه ويسر بعد الخـدر            والخدر ما دام

امعيده الكفر عيد النصر           وامنشره أعلام

وبديهم اخضاب        لوعني جم باب

من جور الايـام        من جور الايـام

*     *     *

نـار الشمـاته لوّعت كلبـي المهظــــوم

يوم الوصلنه الشام ريت الشــام معدوم

اتلكونه بقواس النصر واجديــد الهدوم

وامصافح العيد ابفرح ذبحة المظلــــوم

صار الأمر حتى الظهر            وكفه اعلى الاقدام

وراس الفخر بيد الشمر            عالرمح جـــــدّام

بالصخر ينصاب         لوعني جم باب

من جور الايـام        من جور الايـام

*     *     *

بعد الخدر فرجه صفينه الكوم الارجــاس

ويّه الظهر اكثر عليـنه التمّت النــــــاس

والشمر جاب الروس كل جانب نصب راس

كفار ما بيهم رحم لا بيـهم احســـــــاس

يبجي الطفل خوف اوّجل           لو طاح ما كـــــام

كالـوا خـوارج ديــــــــن           واحنه روح الاسلام

والاهل غيّــاب        لوعني جم باب

من جور الايـام        من جور الايـام

*     *     *

فرحانه هالناس ابسبينه وتضرب ادفوف

تتفرج اعلينه ابشماته امحنيه الجفـوف

من حالة الأطفال عيني عمت ماشـوف

بحبال مربوطه وتتراجف من الخــوف

طول الوكت محّد غمض           منـــــهم ولا نام

والينعس ابسوط الشمر           يتلوّه عالهــــــام

وضيّعت الحساب        لوعني جم باب

من جور الايـام        من جور الايـام

*     *     *

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى