صاح جبريل الأمين راح أمير المؤمنين
طاح ساجد حيدر اليحمي حماه
طاح ساجد و انخضب شيبه ابدماه
صاح جبريل الأمين راح أمير الؤمنين
* * *
صاح جبرائيل ينعه و رج سماوات السبع
حيدر اتصوّب ابراسه طاح ساجد من ركع
ضجّت الأملاك كلها و عالم العلوي انفجع
اصطكّت ابواب المساجد و انمزج دم او دمع
راح أمير الغزوات هوى ابمحراب الصلاة
اشلون ضربه خلت الدنيه تميد
ابئيد مجرم حاقد اعليه او عنيد
اشتفه حقد الحاقدين راح أمير المؤمنين
* * *
طاح ابو الحمله ابسجوده و الوحي ينعاه صاح
اتفازعوا أولاده يمه ابلهفه ما بيهم أرواح
هذا ليضمّه و يشمّه و ذاك دمعه اعليه ساح
لعد بيته شايلينه اتلگته الحره ابنياح
طلعت الحره تصيح يخوتي منهو الجريح
هذا ابوج المرتضى صاحت ابصوت
ريت من كبل الولي لفني الموت
تصرخ ابحسره اوّنين راح أمير المؤمنين
* * *
من وصل بيته جريح او على افراشه مدّدوه
مسحوا الدم عن اعيونه و جرح راسه ضمدوه
حسوا ابجرحه خطير او درَوا لنهم يفكدوه
و زينب اتكلهم يخوتي ابراحه ابوكم سندوه
اتكلب إيديه و تنوح بويه بعدك وين اروح
ردت من عمري اعلى عمرك يالحبيب
شلي ابعمري العيش بعدك ما يطيب
آه من فجعة البين راح أمير المؤمنين
* * *
يا علي اسم الله على اسمك ريت لن روحي فداك
اشلون أعيش او أبكه بعدك للكبر خذني اوياك
امنين اجتني هالمصيبه امنين لبن ملجم إجاك
جرحك ابكلبي اهجسه و انخلط دمعي ابدماك
أشبه الطير الجريح كون أموت او أستريح
من سمعت الناعي ينعاك ابعويل
رجفت اعظامي وظل دمعي يسيل
ابتعب كل ذيج السنين راح أمير الؤمنين
* * *
فتح عينه و صاح هيد ي تلحكين اعلى النحيب
بويه جدامچ مصايب الطفل منها يشيب
ايحكلج اتنوحين بويه من اتشوفين الغريب
كلسا يرجع لج ابجثة غالي و ابدمّه خضيب
يفكد أحبابه جميع وينذبح بيده الرضيع
أيروح يم العلكمي و يرجع وحيد
منحني ظهره على فكد العضيد
صيحي صيحي يا حسين راح أمير المؤمنين
* * *
اتكلّه بويه اتوصي بيّه لو تبشرني ابمصاب
أرد اموت اوياك اخذني او لا أعيش ابهالعذاب
كافي ضلع أمي و صدرها انكسر من عصرة الباب
كلها يا بويه المقدر ما يفيد اوياه عتاب
صبري لو هجمت الخيل وعالنهر نام الكفيل
و اخوتج نومه ضحايه اعلى الصعيد
غصباً اتروحين مسبيّه اليزيد
لامحامي اولامعين راح أمير المؤمنين
* * *