رمله والقاسم

يبني يا سلــوتـي          يا ثمـــر مهجتي

ولّعــت شمعتــك          وانتظـــر زفّتـــك

يا ثمــر مهجتـي

*     *     *

يوليـدي صــار اسنين وأنا انتظـــر

ساعــة زفــافك يمــن لمّــك ذخـــر

وسفــه جفــن لابس ينـور البصــر

شتسـوّي أمك لو فجعهـــا الدّهـــر

تنعكـس فرحتـي          وما تجف دمعتـي

نصّبت حوفـتـــك          وانتظـــر زفّتـــك

يا ثمــر مهجتـي

*     *     *

 

مــن جنت الوليلك و اهـــزّ المهـــد

تتبسّــم ابوجهــي ينـــور السعـــد

بسمتـك بلســـم لعــد كلبي وضمــد

لو رحت يا جاسـم إلــي هــم تــرد

تنسعــــد دنيتـي          ابردّتـك فرحتــي

افــرح ابرجعتـك          وانتظـــر زفّتـــك

يا ثمــر مهجتـي

*     *     *

يرتـاح كلبـي لو ابتســم لي ثغــرك

اتمنيت من عمري يوليدي العمــرك

من كمت تمشي كلبي يمشي اباثـرك

واتــأملك عريـس وامشــي ابكتـرك

يبني من حسرتي          تشتعــل جمرتـي

هاك اخذ حنّتــك          وانتظـــر زفّتـــك

يا ثمــر مهجتـي

*     *     *

اتمنّيت يبني ايكون احضر عرسـك

اهدوم عرسك عمّك حسين ايلبسـك

ما جنت اظن يبني المنيّه اتحـرسك

تلبس جــفن واتـروح وافكد حسـك

يبنــي ابوحدتـي          مـن يلــمّ كبرتــي

دهــري بيّه فتـك          وانتظـــر زفتـــك

يا ثمــر مهجتـي

*     *     *

ناداهـــا يمّــه للحـــرب رخصيني

كطعــي الأمــل من ردّتـي اوّدعيني

عمّي وحيد افديـه ابروحـي وعيني

يـا بعــد روحي نادتــــه تــانيني

خل أشــم وردتي          وتنطفــي لهفتـي

ريّض ابروحتــك          وانتظـــر زفّتـــك

يا ثمــر مهجتـي

*     *     *

ضمّت ولــدها لي صدرهــا اتودعــه

تلثـم اخــدوده وتهــل دم الدمعــه

لا تلــومني يبنـي وداعــك فجعــه

اوحيّــد ييمه وضاكت بيّه الوسعــه

ردتـــك الموتتــي          اتشيّـع اجنــازتي

مانــي اميمتـــك          وانتظـــر زفّتــــك

يا ثمــر مهجتـي

*     *     *

للخيمـــه ردّت كــابلت شمعتــــه

تبجـي وكلبهــا يلهــب ابجمرتــه

لـن جـاسـم اجنــازه رجع شافتــه

طفّــت شمعتــه وانحنـت شبكتـــه

اتكلـه يا ضنـوتي          خمّــدت شمعتـي

أمّــــك الغذتــك          وانتظـــر زفّتـــك

يا ثمــر مهجتـي

*     *     *