زينب تخاطب الحسين(ع)
يبن امّي طـايح ويـن أجـيـك امنيـن دلّـيـنـــي
آنه الفجعني البيـن خويـه حسـيـن حاجينـي
جـانـي الـمـهر ينـعـاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
آنـا الـعـقـيـلـه اهمـومي ثجيله و جـارت علَـي دنيـاي
يا خويـه وينـك صـد لي ابعينـك فـدوه إلـك عـيـنــــاي
مـهرك لـفـانـي هـدّم كـيــانــي و اتـعـثـّـر ابمـمـشـاي
جيتـك أشـوفـك مكـدر أعـوفــك فـكـد الأخـو جــــوّاي
تفداك خويـه الروح يـا مـجـــروح نـاديـنـي
ابيا كـتـر مـطـروح خـويـه النــوح عـامينـي
مـا أصـبـر الـفـركــــاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
كـلـهـا تـعـالـي شوفـي اشجرالي كل جسمي صار اجروح
ظـامـي تـرانــي يـابـس لـسـانـي مـتعـوبـه مـنّي الـروح
وصلت له تنحب كـلـهـا يـزينـب كـافـي يخـويـه النـوح
ردّي الخـيمـنـه لـمّـي حـرمـنـه اتكلّه ابـدمـع مسـفـوح
اشلون ابطل ابجاي و انتـه ابـهاي تـدرينـي
منته الربيت اوياي و بـعــدك داي يـاذينـي
هاك اخـذ روحـي هـاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
جــرحـك أشـدّه ابروحي اضمـده اتمـنّيـت إلي روحـيـن
روح التـسـنـدك و روح التضمـدك و اتفـزّ يخويـه حسين
روحي او روحك اتضمّد اجروحك و تشـفـه ينـور العيـن
أتـمـنـّه مـوتــي وسفـه يخـوتــي بيـكـم فجعنـي البيـن
حركوا خيمنه الكوم يـا مـظـلـــوم سـابيـنـي
وابنك علي مسـكـوم حـالـه الـيـوم مـاذيـنـي
ريـت الـعـمـر يـفــداك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
سلبـوا حرمـكـم حركـوا خيمـكم فـرّوا حـرم و اطـفــال
فـوك الـمـصيبـه صـارت نهيـبـه ظـلـيـنـه بيـن انــذال
يـسلب الـطـفـله وهـيـه تـكــلّـه أشـكـي لـبـوي الحـال
وسفـه وهظـيـمه أمـسـي يتـيـمـه خيـمـه الأبـو و ظـلال
فرشت لك امصـلآّك وهـي تـتـنــاك تنخينـي
عمّه الأبوي اهنـاك كـلـبـي اشتـاك ودّيـنـــي
مـحـتـاره ويـن الـكــاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
أطفـال افكدتـهم مـــن دوّرتــهـم لنـهـم عـطـش ميتيـن
وطفله ابهظمـها اتدوّر على امـها تنشـدنـي أمـي ويــــن
اوّحده ابحزنـها اتــدوّر ابـنــها تنحب و تجري العيـن
و ظـلـيــت أدوّر وكـلبـي تـفـطّـر المسـلـم غـدوا طـفـلـين
أمهم تصيح ابصوت ريت الـمــوت يـلفـيـنـي
تبجي ابألم مكبوت آه الـمــــــوت جـافيـنـي
رادت تـجـي تـنـخــاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *
كال الها هيـدي يختـي اشبيـدي دمـعـج عـلـي مـيهـون
لـمّـي أطـفـالــي وبـاري اعيـالـي باليسـر مـن تـرحــون
يختـي إصـبـري ومُـرّي ابكبـري ازيـــاره مــن اتـردون
كـربـت وفـاتـي وآخــر حـيـاتـي الذبحـتـي اتـشـوفــون
تاعبني طرد الخيل مـالــي حـيــل عـذرينـي
دمعج علي لا يسيل ابـصـلاة الليـل ذكـرينـي
يبـن امّـي مـا أنـســـاك خويه ارد امـوت اويـاك
آنه الفجعني البيـن خويـه حسـيـن حاجينـي
* * *