زينب والأسر
كربلــه زينب سبـــوها مـا دروا حيــدر ابــوها
كربــلا عنـدج خبــرها صــدك زينب سلبــوها
* * *
جينـــه ننشــد كربلــه انريــد الخبر
صــدك زينب سالبيــها اهـــل الغدر
ويـــن عنـــها راح عبــــاس الكــمر
اشلـــون يتجـــرّأ ويسلبــــها الشـمر
كربلــه اشلـون العقيلـه تنسلب وهيــه الجليلـه
ايصيــر اهاليها نسوهـا صــدك زينب سلّبوهــا
* * *
رد لســـان الحـــال هــالموقـف كلف
حسيــن يــوم الطــاح الحـال اختلف
جيـــش اميـــه يـــم المخيـــم زحف
صـــــار زيــنب حـــالها ما ينوصف
اجــه الميمـون ابصهيله من الخيـم طلعت العيله
راحت زينب يم اخوها صــدك زينب سلّبــوها
* * *
شـــافت ابن امــها على الغـبره وكع
والشمــــر بالسيـــف للمنـــحر كطع
ابســرعه راس حسيــن عالرمح ارتفع
بعــد ذيـــج الســــاع كلشـي ما نفع
للخيـــم ردّت نحيلـــه حايـره المدمع تسيلــــه
لن الخيــام احركوهــا صــدك زينب سلّبــوها
* * *
ابشعلـــة النـــار الحــرم لزمت افرار
زيـنب اعلى الّتــــل تصيح المستجار
النّــــار آه النّــــار سلبتنــــه القرار
يا هلي منهـــو الذي ايخمّــــد النار
وينـكم يهـــل المحنّــه طفّوا نار اللي ابخيمنــه
والاطفــــال الضيّعوهــا صــدك زينب سلبوهــا
* * *
ايكـــول ابن مسلــم ابخيمــه المسْعره
اعليـــل نايـــم بالحريجــه مــا دره
شفت وســـط النـــار حرمــه امحيّره
تستغيـــث اتنــــادي يا سيــد الوره
امتــك مـــا يرحمونــه حركوا اخيمنه وسبونـه
العتره يا جـدي فنوهـا صــدك زينب سلبوهــا
* * *
شفت حرمــه ابوســط خيمه التلتهب
صحــت بيـــها النــار بطرافج تشب
اتكلي بالخيمــــه عليـل او ارد اطب
طلعت اتسنـــد العليـــل وتنتحـــب
جابته الخـارج الخيمـه وتـون من كثر الهظيمـه
هالعليل البيــه وصوهـا صــدك زينب سلبوهــا
* * *
فتح عينـــه وصــاح ابوي حسين وين
اتكله شوف اعلى الرمح راس الحسين
كـــال عمي وينـــه بو كلــب الحنين
كـالت ابشــاطي النهــــر عمّك طعين
ما بكه غيــرك يــوالي يا خلف اهلي ورجالي
الكربلـه خل ينشدوهــا صــدك زينب سلبوهــا
* * *
يا لتناشـــد زيـنب اشلــــون انسبت
يكصـــر الســاني امن اكـول اتسلّبت
ابهيبـــة البــاري العقيلــة اتجلببت
بعــــد والتــــاريخ يالنّـــاشد سكت
ظل اسمـها ام المصايب قاست انــواع النـوايب
آل اميّــــه ما رعـــوها صــدك زينب سلبوهــا