الكرامة الحسينية

في دفن الزهراء (ع)

يمه دفنوج ابليل         رحتي امن ايديه

و انهدم مني الحيل       و اصوابي بيه

أصرخ يا يمه   دارج مظلمه   و اليفكد أمه   شيسلي همه

*     *     *

رحتي او ضلعج مهشوم    وسفه يم شبر    غابت من البيت أنوارج

ينضح صدرج ادموم    بالباب اتعوّر    يوم الطاغي طب الدارج

ما مر بعيوني النوم    ابچي و اتحسّر    ابراس احشاي تسعر نارج

من غبتي الهذا اليوم    مكدر اتصبّر    و تنشد عليج ازغارج

يم المحنه    اثرية نزلنه    من رحتي منه    فكدچ هظمنه

مدفونه كبلچ              ريت يا كرة العين

ردي يمن تدرين          عندج ابنيه

يمه عكب عيناج    ظل نزلج أظلم    و خابت يا حيف اظنوني

يالما عرفنه ادواج    حلمي اتحطم    أبد ما جف دمع اعيوني

ريت العمر يفداج    و عمرج اليسلم    يبچون اولادج فجعوني

كسر الضلع آذاج    و صدرج تهشم    أبچي لفراكج خلوني

كوكب سعدنه    فكدچ مردنه    والحزن هدنه    و اشخله عدنه

ظليت انوح اعليج ‏            اليلي و نهاري

الدربج مشبحه العين        صبح و مسيّه

*     *     *

مرت علي أيام   أمرح ابحجرج    حلوه و لذيذات أيامي

و اتمر علي أحلام    و أغفه اعلى صدرج    يا حيف خابت كل احلامي

من عمري هالجم عام    ردته اعلى عمرج    او لاشوفن نعشج جدامي

صار الأمل أوهام    كلت اجي الكبرج    احجيلج همي و آلامي

دهري هظمني    منج حريمني    افراكج سكمني    ابكلبي لچمني

جرحج أبد ميطيب            زيّد ونيني

وجمرة افراكج دوم            تستعر بيه

عاشرت يمه النوح    روحي حزينه    و متفارك صدري العبره

أصفن و احاچي الروح    كبر امي وينه    يا بويه وين كبر الزهره

ايكلي ابدمع مسفوح    بويه اشبيدينه    مظلومه ماتت ام العتره

خلي الكلب مجروح    لاتهيجينه    آهاتي تستعر جمره

أمچ حزنها    ورث إلچ منها    واعظم محنها    لمصاب ابنها

ايموت الحسن مسموم          مكطوعه جبده

و ينچتل ظامي حسين              بالغاضريه

*     *     *

يالمصطفى المختار    بنتك الزهرا    عكبك اصحايك ظلموها

انعصرت اباب الدار    اشسوّت العصره    منها ضلعين الكسروها

و الصدر بيه مسمار    و آثار السطره    فوك الوجن من سطروها

عفيه يا كلبي اشصار    ما نفذ صبره    وآنا اسمعهم ايضربوها

حبتر قهرها    بيده سطرها    و كصر عمرها    يوم العصرها

من الضرب محسن طاح            وانهدر دمه

و انشدها اعليها اشصار           امن الناصبيه

*     *     *

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى