الجزء العاشر

للقاسم

حنة وشمع وازهار

للقاسم

حنه وشمع وازهار     تصبح مآتم

يا جاسم اشتختار      من هالملاحم

من ينصر المظلوم    عمك وحيد اليوم

ياجاسم اشتختار من هالملاحم

********

تنادي رمله يا جسام    يبني وزهرة ايامي

احسك گطعه من قلبي      واحسك فارس احلامي

لكن ما اجه ابالي       اگلك موت جدامي

اسمعت عمك وحيد يصيح    وينه الينصر الظامي

عمك وگف محتار    بين العساكر

وايصد يمين ايسار   وين اليناصر

دارت عليه الگوم     عمك وحيد اليوم

يا جاسم شتختار   من هالملاحم

*************

تمنيتك يبعد الروح    اشوفك يبني امعرّس

احضر بالحفل يبني    اهلهل وانثر املبّس

يبني كربلا ودهري   كسر گلبي عليك اوبس

اخذ سيفك يا جاسم روح     النصرة عمك اتحمّس

الواجب ييمه ايگول    ضحي ابحياتك

وكت الترد مچتول   أرسم صفاتك

ابعيني تظل مرسوم     عمك وحيد اليوم

يا جاسم شتختار     من هالملاحم

*****************

جاسم جاوب امه وگال      ييمه انتظر امرچ

تغذيت الشهامه اسنين     ارضعتها من نمه صدرچ

انا اختار الشهاده اليوم     تمديني ابثمر صبرچ

آنا ابنچ وتدريني     حياتي من ربه حجرچ

ودعتك الله روح     احصد مغانم

خليني سهمي النوح    اصبر واقاوم

اصبر على المحتوم   عمك وحيد اليوم

يا جاسم شتختار   من هالملاحم

***************

إجه القاسم لعد عمه      يحبه وخنگته العبره

يعمي ايگله ارخصني    ترا گلبي نفذ صبره

يگلّه اشلون أأذن لك     وانت امن الحسن ذكرى

ترا سم الحسن للساع     ابگلبي يلتهب جمره

جاسم يبعد الروح     ارحم حناني

لو يبني عني اتروح     ينهد كياني

يبن المضى مسموم    عمك وحيد اليوم

يا جاسم شتختار     من هالملاحم

*****************

يضم القاسم الصدره     ولامة حربه ايلبسه

ادموع احسين تتهامل    بچاه ما ينسمع حسه

ولن رمله تصيح ابصوت    زفوا المعرس الرمسه

وتهاني للحسن ودّوا    ترا القاسم گضى ابعرسه

حنّته ابفيض ادماه     من جابه عمّه

وامّه اطلعت تنعاه     يا فجعة امّه

آيبني يا محروم    عمك وحيد اليوم

يا جاسم شتختار من هالملاحم

*****************

تمت

اظهر المزيد

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى