الكرامة الحسينية

مجيء أهل البيت إلى كربلاء

الكربلـه جينه          انزور أهالينـه

مـن يدلّيـنـــه          مـن يـدلّينـــه

*     *     *

يا نازلين ابكربلـه اشعــدكم خبــر

وين كبر حسيـن مـحــزوز النحــر

انزور جينه انريد نشكي اللي سدر

من مـــآسي الـمـرّت ايّــــام الأسـر

نشكي ماضينه          للولي جينــه

مـن يـدلّينـــه          مـن يدلّينـــه

*     *     *

عفنه جثة حسين مطحونــه طحن

حلّــه حمـره لابـس ابــدال الكفن

صحنه آيحسين مـن ســاك الظعـن

اليـــوم إجينــه بالمــآسي والشجن

بالحزن جينه          انبث مآسينـه

مـن يدلّينـــه          مـن يدلّينـــه

*     *     *

ها يهـالي كربلــه اشعدكــم علــم

عــن كبــر عبــاس شيّــال العلــم

يوم رحنه اعيونه طافيهـا السهــم

مادره اشصار وجره ابيسر الحــرم

اليـوم ردينـه          انشوف والينه

مـن يدلّينـــه          مـن يدلّينـــه

*     *     *

عفنـــه شيّـــال العلــم عالمشرعــه

ابغير راس اجفوف ايديه امكطّعـه

ابيــوم مرّينــــه عليــــه انودّعــه

صحنـه يا عـبـاس لكــن ما وعـــه

بيـه مـرّينــه          اعليه حنينـه

مـن يدلّينـــه          مـن يدلّينـــه

*     *     *

ابهالأرض عفنه أجساد ابلا غسـل

امكطعيــن الــروس ويّـــاهم طفـل

هـالطفـــل عطشـــان روّوه بالنبـل

شرب دمّــه ابســاع وافــاه الأجل

مـات من حينه          راح امن ايدينه

مـن يدلّينـــه          مـن يدلّينـــه

*     *     *

عفنه جاسـم بعــده ابســنّ الغَرس

لجل دينه قاتَـل او ضحّـى النفس

كربلــه شـــافت مراسيــم العـرس

وشمعتـه أعطت إلـى العالــم درس

صارت الزينه          من دم اجبينـه

مـن يدلّينـــه          مـن يدلّينـــه

*     *     *

عفنــه الاكبر جنّه مصبــاح اليشـع

راح للحومــه او منهــا مــا رجـع

كطّعــوه الكــــوم أشـــلاء و كطـع

راح أبــوه حسيـن والجثتـه جَمـع

جابه بيدينــه          واتهمل عينـه

مـن يـدلّينـــه          مـن يـدلّينـــه

*     *     *

 

 

 

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى