عصروني بويه الأصحاب ما بين الحايط و الباب
ويلاه وا نبيياه ويلاه وا نبيّاه
* * *
من غفت عينك اصحابك شنوا اعلينه الحرب
و الخلافه اهل السقيفه من الوصي اخذوها غصب
الكال لك تهجر إجانه شايل اوياه الحطب
يا علي إطلع و بايع يهذي ويهد ابغضب
تدري اشجرالي ياياب مابين الحايط و الباب
ويلاه وا نبياه ويلاه وا نبياه
* * *
صاح لو تطلع يحيدر وله دارك تشتعل
الساعه أحركها عليكم لو الأمري تتمثل
كتله رد شتريد منه و رفس الباب ابزعل
الباب يوم انفك عصرني عمدا ابئيده النذل
عمداً عصرنى وماهاب مابين الحايط و الباب
ويلاه وا نبيّاه ويلاه وانبياه
* * *
اعناد رد الباب بيده و آنا أصرخ يا علي
جرح المسمار صدري اشلون ترضه أنولي
من سمع صرختي الفاجر شال إيده و رد إلي
على اعيوني من لطمني طحت و ادموعي اتهلى
و انصبت يا بويه اصواب ما بين الحايط والباب
ويلاه وا نبيّاه ويلاه وا نبيّاه
* * *
صوّب المسمار صدري وصحت آه امن الألم
من سمعني صحت بويه اتعمّد النوب الخصم
و اتكه اعلى الباب يدفع حيل ناويلي الحتم
اكلوب هالأشرار جلده أبد ما بيها رحم
ناوي اعلى موتي النصاب ما بيين الحايط و الباب
ويلاه وا نبيّاه ويلاه وا نبيّاه
* * *
أشد من كل الجرالي اتوهدنت وكت الهجوم
بويه محسن طاح ميّت ابساعة الدخلوا الكوم
خايفه ايدوسون طفلي و آنا ما أكدر أكوم
و بالحبل جتفوا حيدر كثرت اعليه الهموم
ذاك الوكت ضلعي انصاب مابين الحايطو الباب
ويلاه وا نبّياه ويلاه وا نبيّاه
* * *
صحت يا فضه تعالي لزمي ضلعي المنكسر
ابساع كومي ستديني مابكه عندي صبر
ارد اشوفن وين حيدر ما خذينه اليا كتر
آيبويه اشصار بيه مرمروني هالكفر
ضلعي انكسر صدري انعاب ما بين الحايط و الباب
ويلاه وا نببّاه ويلاه وا نبياه
* * *
صحت يا كفار بسكم خلو بن عمي يرد
لن يرد لي افلان غاضب و التفت كل للعبد
هاك سوط اضربها بيه و لاتمل لمن ترد
انهال بالسوط اعلى ظهري من الهظم كلبي انمرد
صدري انجرح كلبي ذاب ما بين الحايط و الباب
ويلاه وا نبياه ويلاه وا نبيّاه
* * *
و جيت يا بويه اشتكي لك شوفني اعليّه اشجره
أمشي او إيدي اعلى ظهري امن السياط امعوّره
انجرح صدري و عيني حمره و الضلوع امكسره
والعبد يوم الضربني أظن حيدر ما دره
ضربوني من غير أسباب ما بين الحايط و الباب
ويلاه وا نبياه ويلاه وا نبيّاه
* * *