الكرامة الحسينية

مصيبة يتامى مسلم بن عقيل

يسجّان اليتامــه          أحلفك بالإمامــه

احسبهم عندك اضيوف          اصغار اوخذهم الخوف

يسجّان اليتامــه

*     *     *

حزيـــنه امهم وتتنشّـد          ويـن السجن دلّـونـــــي

منــي راحــــوا اولادي          ثمر كلبي وضــوه اعيوني

فرّوا يوم طاح حسيــــن          وشافوا الكــوم سلبونـــي

سجنوهم برض كوفـــان          ومنهم حيف حرمـــوني

مــارحموا يتمهم          ولا حنّوا على امهم

أنادي ابكلب مـلهــوف          اصغـار اوخذهـم الخوف

يسجّان اليتامــه

*     *     *

 

يتـــامه اثـنـين راعيــهم          عليك الـله يهالسجّـــــان

بـــارد مـــاي دسكيـــهم          عطـــاشـه ومالهم وليـــان

يـوم انكـطـع راس حسين          خــافوا سلكـوا الوديــــان

ابنـــوم اللـيـل غطـيـــهم          جزاك اعلى النبي العدنان

من راحوا اولادي          ظل يرجف افّــادي

عليهم كلبي مخطــوف          اصغار اوخذهم الخوف

يسجّان اليتامــه

*     *     *

طــــاهر يبني عفتـونــي          ولـدري ويـن ملفــــــاكم

من رحتوا يماي العـيــن          أخذتوا كلبي اويــــــاكم

وكعتوا بيد اهل كـوفــان          بعد هيهات ألكـــــــاكم

السجن ظلمه يماي العين          وثكـل الكيـــد آذاكـــــم

ما بطّل ونينــي          وما فتّر حنينــــي

أهلّ الدمــع مـــذروف          اصغار اوخذهم الخوف

يسجّان اليتامــه

*     *     *

سمعت من السجن طـلعوا          الحارس حنّ اوخلاّهـــم

النهــار ابطـوله يتخفّون          بس بالليـــل ممشــــاهم

عكب ما ضافتهم الحرمه          اجه الحارث تولاّهـــــم

كــــال آنا اتعبت نفسـي          وتالي ابّيتي الكــــــاهـم

ما حنّ البجيهم          من جتّف ايديــهم

محّد بيــــــهم ايـروف          اصغار اوخذهم الخوف

يسجّان اليتامــه

*     *     *

اجـه الحارث وجتّفهـم          عليهم غـلك بــاب الدار

طــول الليـل مرعوبيــن          يهلّـــون الدمـــع مدرار

من صــــار الصبح أكبـل          عليهم شاهـر البتّـــــار

يكلهم كـــوموا أذبحكم          وجائزتـي ألف دينـــار

صاحوا انريد أمنا          وكت المـــوت يمنه

رادوا أمهم اتشـــــوف          اصغار اوخذهم الخوف

يسجّان اليتامــه

*     *     *

يكلّــوله يتــــامه احنـه          درجّعنــــه لهــاليـــنـه

يشيــخ انجــان ما تقبـل          لعـنـد الســوك ودّيــــنه

تراهــــا النّــاس ترغبنه          و تـدفـــع كل ثمن بيـنه

كلهــم لازم اذبـحـكــــم          و شال السيــف بيميــنه

التمسوا بيه الطفلين          خَلِ انصلّي ركعتين

اعمل بيــــنه معـروف          اصغار اوخذهم الخوف

يسجّان اليتامــه

*     *     *

من صلّوا صـلاة الخــوف          بجـوا وتشابكوا الاثنيــن

الجبيـــــر ايودّع الثاني          يـكـلّه حـل يخويه البين

الزّغير ايصيــــح يا يمّه          بيـنـه اشـصار ما تدريـن

كـطّـع روســـهم حـــالاً          وسحـبـهم للنهر جثتيـن

ذبّحـــهم ضمايــــه          والشط يجري مايـه

ابدمهم كتبوا احــروف          اصغار وخذهم الخوف

يسجّان اليتامــه

*     *     *

 

 

اظهر المزيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى