زينب والأربعين
مكســورة خـاطر جـيت يــم كـــبرك واتعنـــّيت
محّد وكف دوني
خويه انشدني اشلاكيت رحـت او يمكـم ردّيـــت
يحســين يعيوني
* * *
يخويـه من طحت تدري اشجره ابحـالي
مســه بــيتي يخويـــه من الزلم خــالي
بس ابنــك عليـــل الظــل إلـي والــــي
خيمنــه تشتعل واركض وره اعيـــــالي
بيـن الســـلب والنـــار وبيـن أسيــاط الأشـرار
يا خويه عفتــوني
عالتـلّ يا بـو الأحــرار ناديتك شوف اشصـــار
يحســين يعيوني
* * *
ابيسـر عنكم مشــينه والولــي امكيّـــــد
دخلنـه الكوفــه شفنـه اهـوال ما تنعـــد
العــدو ابن ازيــاد يــوم الشافنـه عيّـــد
راســـك بين إيديـــه واعلــينه يتهـــدّد
وآمرنه انروح الشـــــام اتمرمرت بالأيتـــــــام
وما غمضت اجفوني
اشعملت بينه الأيــــام من أعتب ما أنــــــلام
يحســين يعيوني
* * *
وصلنـــه الشّـــام وأهاليــــها تلكّــونـــه
ابطبل وادفــوف ومن نبجــي يشـتمونــه
ثلاث ســـاعات ابّاب الشــــام خـلّونــه
فرحــــانين خــــوارج دين يســــمّونــه
رحنه الديوان ايزيــــد عنده صار أكبر عيــــد
يا خويــه شتموني
كل ساعه البلوى اتزيد ولراسك مــدّ الإيـــــد
يحســين يعيوني
* * *
ابمجلس عــــام وكفنه خـــويه جدّامـــه
ولـــن شـــــامي يكـــلّه من هاليتــامـــه
اريـــدن اشتريــــــها البــــيتي خدّامــه
شبكــــتني الطفلــــه ابدمـــع يتهامـــى
مرعوبه اتصيـح ابخوف بيّـــه منهـو المكلـــوف
ايصـــير ايبيعوني
وابنك واكف مجتـــوف ريتك حاضر واتشـــوف
يحســين يعيوني
* * *
علي كـال احنـه أهل بيت النبي المختـار
تبـــيع اختي وجـــدها حيدر الكــــرار
شــــال السوط على راسك يضربه امــرار
صـــاح اخذوه يا غلمــــان عليّه جـــــار
جرّوه اوصحت ابصوت يا محله اوياه المـــوت
من كبله ذبحوني
هدّمتـوا إلنــه ابيـــوت يا وسفه فـات الفـــوت
يحســين يعيوني
* * *
سـكنّــه بالخرابــــه والكــــلب مـالــوم
ونص الليـــل رُقيّــــه فــزّت من النـــوم
تنـــــاديني أريـــدن والــدي المظلـــــوم
كبل ساعـــه إجــاني والدمع مسجــــوم
كلّــي بس لا تبجيـــن ساعــه وبيّه اتلحكيـن
من عنده حرموني
تنشــدني الوالد ويــن واتهل دمـــوع العيــن
يحســين يعيوني
* * *
جـــابوا راسـك الها شافتــه وصـــاحت
على شوفـــك الطفلــه شهكت ومــــاتت
بس اشحــــال روحي الذبحتك شـــافت
يخويـــه غسلتهــا اهنــــاك واتـــوارت
جيت ارويلك أخبار من مرار الأشـــــرار
بالسـوط ضربـوني
تاهت خويه الأفكار روحي مشتعله ابنار
يحســين يعيوني
* * *
