عقيلة بني هاشم زينب (ع)
زيـنـب آنـا ام المـصـايب الدنيـه راوتني العجايب
اشكثر حاربنـي زمـانـي وهدّمت حيـلي النـوايب
* * *
زينب آنــا المـارحــم حــالي الدهــر
عشت ويّه امــي و ابوي احلـه العمر
واخوتـي وجدي النبي سيــد البـشـر
اشـلــون حـلوه جانت أيـــام الصـغـر
جـدّي يوم اغمضت عينه جـــارت الأمّـــه علينـه
اتـمـرّدوا لجــل المناصب وهدّمت حيـلي النـوايب
* * *
بضعة الهـادي الحـزن بـيـها مــضـه
تــون مـــن اضلوعـــها المتـرضـرضـه
مــاتـت امـي ابعينــي اسـودّ الفضــه
ابليــل شيّعــها و دفنــهـا المرتضــى
اندفنت ابليــل الحبيبه ونارهــا ابكلبــي لهيبه
صعبـه يا نــار الحبايب وهدّمت حيـلي النـوايب
* * *
الدّنيــه لفّـتـنـي ابجـلاليب الحــزن
راح ابــوي المـرتـضـى و راح الحسـن
و ابـو اليمه راسـلـــوه أهــل الفـتــن
و صـارت السفـره و مشينه امن الوطن
ابكربلـــه يــوم النزلنه اتـذبّحت بيــــها أهلنـه
و بـدت نيـران الحرايب وهدّمت حيـلي النـوايب
* * *
و عـطشت الاطفـــال كـلـها و الحــرم
و راح ايجـيـب المـــاي شيـّـال العلــم
شكَوا الجــود او رمـوا عينــه بسهــم
و راسه بالعــامـــود ياحيف انجســم
راح ابو اليمــه يشـوفـه مرمي و امكطّعه اجفوفه
رد علينه ابدمـع ساجب وهدّمت حيـلي النـوايب
* * *
حسين ظـل بين العده حـايـر وحـيــد
لا اصـحـاب اولا أولاد اولا عـضــيـــد
وراسه اتريده العده اتـقـدمه الـيزيــد
سوّه بيـهم مـذبـحـه و صـاح الشهيــد
ابـراسي لو ينحفـظ ديني يا سيوف العده اخذيني
وكلبي اعلى حسين ذايب وهـدّمت حيـلي النـوايب
* * *
رحت شفت حسين مرمي اعلى الترب
و سـهـــم المثـلـث تنـــاصف بالكلـب
و راســه المشـرّف على الرمح انتصب
سلّبونـــه و نهـبـــوا اسبــاب الطنب
حركوا اخيمـنـه عليـنـه آه وتقــــرر سبينــــــه
حـرم ما بيـن الأجــانب وهدّمت حيـلي النـوايب
* * *
عفـت اخــوي حسين محزوز النحر
والبطل عبـــاس يم شــاطـي النـهـر
رحت للكـوفـــه يسيره اويه الشمـر
ابجلستــه ابن ازيــاد راواني القهـر
ساكـوا للـشـام الظعـينـه الشمــر يتــــأمّر علينه
و آنـا مـكلوفـه ابغرايب وهدّمت حيـلي النـوايب
* * *
من وصـلنـه الشــام كلنــــه امكيدين
بالحبــل طـبـينـــه ديـــوان اللعيـن
وراس اخوي اكبــاله ابطشت اللجين
الشامي رايد يشتــري بنــت الحسين
رايـد ايبـيــع اليتيــمـه صحنـه كلنه بالظليــمه
و كعّـدونـه بالخـــرايب وهدّمت حيـلي النـوايب