في وفاة النبي محمد(ص) 2
اليوم تنحب فاطمة مات ابوي الهادي
ذاب گلبی والحبیب اگبالی ممـــــــدود
*************
اظلمّـــت الدنيا ابعيني مــات ابوي المصطفـى
محتضــــر وايديـر عينه والنّفـــس منـه اختفى
آه يا بويـــــه الفگــــدته ونوره من بيتي انطفى
ريت گبله الموت اخذني عگبه عالدنيا العفــــــا
اوداعـة الله يالحبيب ريت روحي فـــدوتك
بعد صوتك ما أسمعـــه وتظـــل مفگــــــــود
جرح فگدك ما يطيب وعني غابت طلعتك
بعد صوتك ما أسمعه وتظــــل مفگــــــــود
********************
شفتوا قائد راد يوصّي والرعيّه تمنعـــــه
راد يكتب گالوا يهجــر لا نطيعه ونسمعه
انكشف عن عينه الحجاب وشاف أصل الفاجعه
شاف نار الگوم بعــده اباب بيته امولّعـــه
شاف بنته تنفجــــع بالعصي موسومه
ينحرگ باب الرســــاله ويظــــــل مسدود
وينكسر منها الظلــــع فاطمه المعصومه
ينحرگ بيت الرســـاله ويظـــــل مسدود
******************
شاف أصحاب السقيفه غيرها الچانت أمس
والخلافة اتصير مغنم للّي ما يسوى فلس
تنتظر موته ابسرعــه ولعــد ورثه تختلس
للوصيّه ينكــــــــروها بيها يتقمّص رجس
انكسر قلبه البضعته شافها ايعصروها
الباب للحايط طبگها اعليها نمـــــــــــــــــرود
اعليها سالت دمعته ابسوطهم ضربوها
الباب للحايط طبگها اعليها نمــــــــــــــــرود
******************
شاف حيدر گايدينـــــه الحچي بيهم ما نفـع
رايدين البيعــــه منّــه اتكاثر اعليه الجمـــع
وفاطمه اتنادي يحيدر طفلي بالعتبه وكــع
جتفوه بحبل سيفــــه وغصبن اوياهم طلع
ليها رد ذاك الخصــــم شال ايده اعلى البتول
انشلّت ايده من سطرها اتعدّى الحــــــــــــــدود
ابچفّه للزهره لطـــم ما حشم بنت الرسول
انشلّت ايده من سطرها اتعدّى الحـــــــــــــدود
******************
والمصيبة مستمـــــره وسمّموا چبد الحسن
والمره ما رضت سبطه ابكتر جـــــــده يندفن
اتجسمت له هالمصايب وكت موته بالحــــزن
شاف سبطه حسيـــن برض الغاضريه ممتحـــــن
ابجثة القاسم رجـــــع وامه تنطـــــر جيته
كل أملـــــــــها جاســـــــم الها يرجـــــــع اردود
لا زفاف او لا شمــــع اشحال رمله اتلگته
كل أملــــــــها جاســـــــم الها يرجــــــــع اردود
******************
شاف سبطه احسين گاعد يبچي يم جثــة علي
امگطع اوصال وجمعــــــها ولفها وادموعه اتهلي
شافه يم عباس واگـــــــف صاح راحوا كـــل هلي
يعباس انكسر ظهــــــــري وبعـــــد غيرك ما إلي
وشال بيديه الطفـــــــــــل وبيه تعنّى الحومــــه
رادهم يسگونه مـــــاي الطفــــــــل ممــــــــــــرود
صـــار مردوده النبـــــــــل شرّبوه ادمـــــــومه
رادهم يسگونه مــــــاي الطفـــــــل ممـــــــــــرود
***********************
شاف ابو اليمه طريح اعلى الثرى وجـــــــاله الشمر
اتربّع ابصدره العنيد وگـــــطع راسه امن النحـــــــــر
واجت خيل الاعوجيّه اتكسّر عظام الصدر
والرسول اغمى عليه ابحين شـــــــــــاهد هالصور
صاح آه ياحســــرتي اوصيّتي نكروها
إلي اويه آل أميـــــــه يـــــــــــــوم مشهـــــــــــود
تندعي مـــن أمتي وعيلتي ظلموها
إلي اويه آل أميــــــه يــــــــــــــوم مشهـــــــــود
******************
تمت