لأبي الفضل العباس (ع)
يميني يالكًطعتوها يميني أجاهد بيها عن مبدأ يقيني
حياتي الآن فده وقربان لبو الأكبر
************
لبو فاضل سجل ليه الكــــرم ينسب ملك ماي النهر ظامي الكًلب يلهب
أبت نفسه العزيزه من العذب يشرب رمه الماي او غده النفسه ابألم يعتب
ينفسي بالحياة اشمــــا إلج مطلب فلا أشــــــرب وجبد حسين تتعطّب
رضيعه من شفت مغمي رضيعه ابعيني ضاكًت الدنيه الوسيعه
حرام الماي يبرد احشاي وطفل مضطر
*************
مله جوده وطلع من النهـــــر مهتم يريد الماي يوصـــــــله يم المخيّم
تصدّت له العده والجيش عليه التم فتك بيها وصبغ منها الأرض بالدم
بروا جفّينه وابعينه السهــــم ألّم ابفكًد الماي على احسينه وكًف سلّم
ابعينه والسهم أثّر ابعينه فروا جوده من كًطعوا يمينه
سهم بالجود إجه العامود أمل طشّر
**************
نده يحسين أخوك الساع وصل حتفه سمع صوته واجاله مسرع ابلهفه
يكًله اعليك يبو فاضــــــل ألف وسفه انكسر ظهري عليك الحاله ما تخفه
يخويه محنتــــــك وي محنتي كلفه يخويه اشحــــــالة اليفكًد أعز ولفه
مصيبه آيبو فاضل مصيبه على المحبوب اليفاركً حبيبه
تهل عينه من اونينه الصخر ينطر
************
إجه ايشيله يكًله خــــــــويه خليني أموت اهنا ألــــــــم فركًاك ماذيني
إذا تكًدر تجرّ السهم مـــــــــن عيني فـــــــرد نظره لعد وجهك تسليني
يكًله وينتحب من هـــــــذي اعفيني تمنيت السهم خــــويه ابنظر عيني
ينوحه ظلّ ابو اليمه ينوحه ولنّه سلّم العباس روحه
جبل وانهد من اتمدد الحزن كبّر
***********
رجع محني أبو اليمه ويهـــــل دمعه لكًى اطفاله اعلى جيْته كلها منجمعه
ينادونه نريـــــد العم يجي ابســرعه يكًلهم راح أخـــــــوي اوما إله رجعه
ولن زينب حزينه ابحـــــاله منفجعه يكًلّلها أخــــــوي الجان إلي شمعه
خسرته وانكسر ظهري خسرته غمض عينه وعلى الغبره تركته
فدالي الروح ميجدي النوح للمقدّر
******************* تمت