لا يوم كيومك يا ابا عبد الله
لا يوم كيومك يا ابا عبد الله
لا يوم المثل يومك يمولانا
هليوم النقدسه ونكثر احزانه
راسك بيه گطعوه ابراس الرمح رفعوه
هليوم النقدسه ونكثر احزانه
******************
يومك قدّسه الباري الجبّار ابهداياك الثمينه
فديت الدين وانقذته من الاشرار يا مهجة نبينه
وگفت اتأبن أحبابك والانصار ابوگفه تعز علينه
وگفت اتنادي الناصر ومحتار بالعيله الحزينه
ولن صوت العزيز الاكبر اينادي
حلا الموت وسگاني جدي الهادي
رحت له ابحال يا حال لگيته امگطع اوصال
هليوم النقدسه ونكثر احزانه
******************
يومك يبو الاكبر يوم حسّاس جرت بيه النوايب
يوم اللي كسر ظهرك العباس من شد عالكتايب
حرت ابسهم عينه وضربة الراس وتقبّلت المصايب
ودّعته وفاضت منّه الانفاس ورجعت ابگلب ذايب
تلگوك الحرم واطفال عطشانه
ينشدوك الگمر وينه يملفانه
عزيت العقيله اونّاتك ثجيله
هليوم النقدسه ونكثر احزانه
******************
رجعت اولنّ إجه القاسم يناديك ودموعه يهلها
يعم رايد ابروحي اليوم أفديك من عندي اقبلها
لبّسته الكفن يحسين بيديك التفت لمّه يگلها
هنيني ييمه اتگله أدريك الشجاعه من اهلها
محروم العرس يبني وضوه عيني
أظل دوم اعلى فقدك اجذب اونيني
جبته امثخن اجروح على صدرك ومجروح
هليوم النقدسه ونكثر احزانه
******************
إجيت اتودع العيله والاطفال لن زينب ابنخوّه
تگلك هالطفل ظامي ابأشد حال لا حيل او لا قوّه
أخذته ورحت بيه يم گوم الانذال عديمين المروّه
فطموه ابسهم دم منحره سال على صدرك تلوّه
رديت الطفل لمّه المحزونه
ناديت الصبر بالأجر مضمونه
وحاطوك الكتايب من اربع جوانب
هاليوم النقدسه ونكثر احزانه
*******************
حاطوك العده من اربع أكتار وانت ظامي اوحيد
ناس البالسيوف وناس بحجار حاشه تلوي الجيد
أشعلت ابو جهم شعلة النار والكل رجع رعديد
خفت عالدين يولونه الكفار ويبگه الحكم ليزيد
ناديت ابعجل يسيوفها اخذيني
أفديت ابحياتي ومهجتي الديني
كل جسمك غده اجروح ابسيف الشمر مذبوح
هاليوم النقدسه ونكثر أحزانه
**************
تمت
على وزن : إلهي رد غريب الدار لدياره