ليلة العاشر
ليلة العاشر
بس الليله يهالعشره وباجر تنفني العتره
باچر يحتيي الدين وين الينصر احسين
باچر تنفني العتره
******************
زينب خايفه الليله على المظلوم واتندبه
تگله ضايگوك الگوم يخويه صحبتك غربه
اخاف انصارك يخذلوك يخويه ابساعة الوثبه
گلها لا يا زينب اصحابي خيرة الصحبه
كل اصحابي نشامه إلي بيهم علامه
يزينب لا تخافين انا ابن امچ انا احسين
باچر تنفني العترة
**********************
نافع من سمع زينب ويّه احسين تتكلّم
راح ايحشّم الانصار يا أصحاب الشدد والدم
گوموا طمأنوا زينب وزيحوا عن گلبها الهم
من سمعوا انصار الدين التموا يمّ المخيّم
نادوها ابإراده اجينه للشهاده
يزينب قرّي العين فدوه كلنه لحسين
باچر تنفني العتره
***********************
زينب سمعت الانصار اجوها وگفت الحره
آنا امخدّرة حيدر تگلهم وامي الزهره
آنا اخت احسين والعباس وگفت اليوم مضطره
شفت لوعات من دهري والليله آخر العشره
وحق سبع المثاني أنا زينب تراني
ابنعمكم يا ميامين حاموا اعيال الحسين
باچر تنفني العتره
********************
الليله احسين وانصاره عدهم مؤتمر حاسم
متصدّر ابو السجاد اخوته وكل بني هاشم
يگلهم احب أنذركم الكل وياي متخاصم
كلها تطلب ابراسي وانتو ما لكم لازم
صاحوا له ابفرد صوت كلنه اوياكم انموت
يبن سيد الوصيين خدّام الك يحسين
باچر تنفني العتره
***********************
گلهم باچر اعيالي تسلبهم الاشرار
اطفالي الخيل تسحگها واخيامي تشتعل نار
گالوله يبو اليمه نعوفك وانت محتار
طلگنه حلايلنه وجينا الك أنصار
كلنه انروح لك فدوه ما نحتاج للنخوه
وحق سيد النبيين نموت اوياك يحسين
باچر تنفني العتره
******************
ابو فاضل وگف غاضب وذب عمامته للگاع
يبو اليمه فداك الروح گومك واخوتك أسباع
ولن زينب تصيح ابصوت اخوي احسين منّي ضاع
باچر ينتهي ابن امي باچر ما يظل مناّع
باچر ينگطع نحره باچر ينهشم صدره
باچر يصرخ الدين گطعوا راس الحسين
باچر تنفني العتره
*********************تمت
طور: أظنها حضرت الزهرة