دخول المدينة
يادار أهـالينـه لا لا تقبلـينه
جيـنه ابهظيـمتنه لا يا مـدينتـنه
لا لا تقـبلـينـه
*******
يوم المشيـنه منّچ أويـانه أبـو الأ كـبر
قائـدنه بواليمّة على ظـهر الفرس يزهر
ويمّه حيـاده امسلّـحة ملتـفّه بالمصـدر
وراية گـمرنه بوالفـضل مثـّلت خطّ احمر
دايم يماشيـنه اولا غمّضـت عينه
شاهدتي طلعتنه لا يـا مدينـتنه
لالاتـقبـليـنه
*******
يوم الوصـلنه كربله لزموا علـينه الماي
ابضحوّية العاشر گضوا كلهم چتـل وليـاي
عباس أخـذ جـوده و گصد للمعركه الرّواي
جوده ملاه اوما شـرب لمخيـّمه رد جـاي
گطعوله چـفّينه ماردبعد ليـنه
وعدوانه سلبتـنه لايا مـدينتـنه
لا لا تقبـلينه
*******
گلبي انمرد لحسين إجه للخيمه يتعـثّر
حيله انهدم يمشي وره اجنازة علي الأكبر
ابحاله رهيـبة شيّـعوا جثـمانه المـوذّر
گبّر صريخ العـايله وسـط الخـيم گـبّر
القاسـم امحـنّـينه من ضـربة اجبـينه
مطفيّة شمعتـنه لايا مدينـتنه
لا لا تقبـليـنه
******
ظلّ الطفل ظـامي يلوچ السـانه بيد أمه
إنشـلّت إيده حرملـه يوم السـگاه دمّـه
واندارت اجيوش العده كلها اعلى بو اليمّـه
وردّ المهر خالي ابصهيله گـاصد اخيـمّـه
ظل والد اسكيـنه جـثّه امسلبيـنه
وكبرت مصيبتنه لا يا مدينتـنه
لا لا تقـبلينـه
*******
حرگوا الخيم سلبوا الحرم تاليهـا گادونه
كلنه على اظهور الهزل للكوفـة ودّونـه
وحتّى الطفل كلما بچـه بالسوط يضربونه
وابجلسة الطاغي إبن مرجانه هظـمونه
إبن ازياد شمت بينه وآمر يمشّيـنه
للشام سفرتنه لا يا مدينتنه
لا لا تقـبلـينه
************
بم يّاب أبوالساعات علينه الناس ملتمّه
وطبّيـنه للطاغي ولن طشت الذهب يمه
كلسا يشيل السوط ويضرب راس أبو اليمّـه
ثار الوليـد إيگـول أخذناه من نبي الأ مـّه
والكربلا جـينه محّد نهض لينه
راحوا كل اخوتنه لا يا مـدينتـنه
لا لاتقـبليـنه
*******
راحت الگـبر أمها تنوح وتسـچب العبرة
اتگلها ييـمّه ابكربله حسين انگطع نحر ه
تمنّيتچ حضرتي و الشمر گاعد على صدره
وايكول أنا ظامي وكلـبي يلتـهب جمره
ليتج حضرتينه يمّه وشفتيـنه
دنيانه إشراوتنه لا يا مدينـتنه
لا لا تقـبليـنه
÷÷÷÷÷÷÷÷تمـت÷÷÷÷÷÷÷÷